‘परदेशी–२’ को झ्याउरे गीत सार्वजनिक (भिडीओ)

काठमाडौँ । चलचित्र ‘परदेशी–२’को नयाँ गीत सार्वजनिक गरिएको छ । चलचित्रमा समावेश ‘परदेशी छुकछुके रेलैमा…’ बोलको झ्याउरे गीत आज सार्वजनिक गरिएको हो । केही दिन अगाडि सो चलचित्रको ‘हिजो काम…’ गीत सार्वजनिक गरिएको थियो ।
यो गीतमा निर्देशक नारायण रायमाझी, तेजेन्द्र गुरुङ, टिका पुन, देवी घर्ती र ममता गुरुङको स्वर छ । शब्द पनि निर्देशक रायमाझी स्वयंमले कोरेका हुन्। उनीसँगै प्रेमदेव गिरीले गीतमा संगीत गरेका छन् ।
भिडियोमा चलचित्रमा मुख्य कलाकारहरु अभिनेता प्रकाश सपूत, अभिनेत्री केकी अधिकारीसँगै अर्का अभिनेता प्रशान्त तामाङलाई पनि प्रस्तुत गरिएको छ ।
शेखर घर्ती मगर, पूर्ण लामा र विवेक खड्का, रविता मगर, पवित्रा गुरुङ, विन्दु खड्का, लाक्पा लामा, सरस्वती धिमाल, प्रजी अहिना सुनार लगायतको नृत्य भिडियोमा हेर्न सकिन्छ ।
रामजी लामिछाने र गोविन्द राईले निर्देशन गरेको भिडियोमा नृत्य निर्देशन भने कुलमान नेपाली र शेखर घर्ती मगरको हो ।
चलचित्रमा प्रयोग गरिएको मौलिक झ्याउे गीतले स्रोता–दर्शकलाई फरक स्वाद दिने निर्माण पक्षले जनाएको छ ।
राजेश वंशल र नारायण रायमाझीको निर्माण रहेको चलचित्रमा प्रकाश, केकी र प्रशान्तका साथमा वर्षा शिवाकोटी, दीलिप रायमाझी, नीर शाह, रमा थपलिया, सबिन बास्तोला, देबेन्द्र बब्लुलगायतको अभिनय छ ।
चलचित्रको कथा एवं पटकथा रमेश बिजीले लेखेका हुन् । मानकृष्ण महर्जनको छायांकन रहेको चलचित्रलाई दीर्घ खड्काले सम्पादन गरेका हुन् ।
युवापुस्तामा विदेश मोह रहे पनि आफ्नै मातृभूमि प्यारो हुन्छ भन्ने कथामा आधारित चलचित्र सेन्सर पास भइसकेको छ ।
यो चलचित्र दशैंको छेको पारेर यही असोजको २६ गतेबाट प्रदर्शनमा आउने भएको छ ।