दयाहाङ र बुद्धि तामाङसँगै ‘नीरफूल’ हेरेपछि मन्त्री किराँती

काठमाडौँ । संस्कृति, पर्यटन तथा नागरिक उड्डयनमन्त्री सुदन किराँतीले शनिबार बेलुकी चलचित्र ‘नीरफूल’ हेरेका छन् ।
उनले सिभिल मलस्थित क्यूएफएक्समा चलचित्रका निर्देशक फूलमान बल, अभिनेताद्वय दयाहाङ र बुद्धि तामाङसँगै चलचित्र हेरेका हुन् ।
‘भूकम्पले समाजमा पारेको प्रभाव, मान्छेको सानो सपनाले दिएको ठूलो दुःख, चलचित्रले अनगिन्ती प्रश्न उठाएको छ। मुख्यतः सहर र गाउँबीचको सामाजिक, सांस्कृतिक सवाल बेजोडसँगले प्रस्तुत भएको रहेछ’, मन्त्री किराँतीले सामाजिक सञ्जालमा उल्लेख गरेका छन् ।
आफूले चलचित्रमार्फत दिन खोजेको सन्देशलाई मन्त्री किराँतीले महसुस गरेको निर्देशक बलले बताए ।
विसं २०७२ को भूकम्पको सेरोफेरोमा कथा भनिएको चलचित्रले विपत्तिपछि धादिङस्थित रुबी भ्यालीको एक परिवारले भोग्नुपर्ने समस्या र बिछोडको दुर्दान्त पेस गर्छ ।
राज्य प्रणालीको कमजोर पक्षसमेत उजागर गरिएको चलचित्र गणेश हिमालमुनिको रुबी भ्याली, रसुवा र काठमाडौँमा छायाङ्कन गरिएको निर्देशक बलले जानकारी दिए । चलचित्र गत जेठ २६ गतेदेखि प्रदर्शनरत छ । रासस