काठमाडौं । बुधबार रसुवाको भोटेकोशी हुँदै त्रिशूली नदीमा आएको भीषण बाढीमा परी बेपत्ता भएकामध्ये हालसम्म २८९ जनाको शव फेला परेको छ।
दिउँसो ३ बजेसम्मको तथ्यांकअनुसार बाढीबाट प्रभावित आठ जिल्लामा शव फेला परेको हो। सबैभन्दा धेरै चितवनमा १२१ जनाको शव भेटिएको छ।
त्यस्तै, पूर्वी नवलपरासीमा ६५, धादिङमा २९, गोरखामा २९, तनहुँमा १६, पश्चिम नवलपरासीमा १४, नुवाकोटमा १२ र रसुवामा तीन जनाको शव फेला परेको छ।
बाढीमा बेपत्ता भएकाहरूको खोजी कार्य भने अझै जारी रहेको छ। नेपाली सेना, नेपाल प्रहरी र सशस्त्र प्रहरी बलको संयुक्त टोली प्रभावित क्षेत्रका विभिन्न स्थानमा खोज तथा उद्धार कार्यमा परिचालित रहेको जनाएको छ।
भोटेकोशी हुँदै त्रिशूली नदीमा आएको भीषण बाढीले तटीय क्षेत्रका विभिन्न जिल्लामा ठूलो मानवीय तथा भौतिक क्षति पुर्याएको छ। प्रभावित क्षेत्रमा उद्धार, राहत तथा बेपत्ता व्यक्तिको खोजी कार्यलाई निरन्तरता दिइएको छ।
