गायक प्रकाश सपुतमाथि स्टेजमै बियरको बोतल प्रहार

काठमाडौं । रोमानियामा हिजो भएको सांगीतिक प्रस्तुतिका क्रममा गायक प्रकाश सपुतमाथि बियरको बोतल प्रहार भएको छ ।
केही दिनअघि सांगीतिक कार्यक्रमका लागि रोमानिया गएका सपुतले हिजो नेपाली समय अनुसार १२ बजे राति स्टेजमा गीत गाइरहेका बेला दर्शक दीर्घाबाट फ्याँकिएको क्यान वियरको बोतल उनको टाउकोमा लागेको थियो ।
सपुतलाई स्टेजमै बियरको बोतलले हानिएको भिडिओ सामाजिक सञ्जालमा भाइरल भइरहेको छ।
सपुतले ‘बोल माया‘’ गीत गाइरहँदा अचानक आधा पिएको क्यान बियरले हानिएको थियो । उनको निधारमा सामान्य चोट लागेको सपुतसँगै रहेकी गायिका प्रीति आलेले बताएकी छिन् ।
कार्यक्रम आधा घण्टा बिथोलिए पछि फेरि सपुतले गायनलाई निरन्तरता दिएका थिए ।
आयोजकले बियरको बोतल प्रहार गर्ने व्यक्तिलाई नियन्त्रणमा लिए पनि प्रहरी कारबाही गरिएको छैन । सपुतलाई हमला गर्ने नियतले नभई रक्सीको तालमा प्रहार भएको जनाउँदै आयोजकहरूले घटनाको जिम्मेवारी आफूहरूले लिने बताएका छन् ।