काठमाडौं । शुक्रबारको प्रदर्शनीअन्तर्गत देशभरका सिनेमाघरमा दुई चलचित्र प्रदर्शनमा आएका छन् । आजदेखि चलचित्र ‘तिम्रो मेरो साथ’ र ‘गुञ्जन’ चलचित्र प्रदर्शनमा आएका हुन् ।
प्रेमकथामा निर्माण भएको यो चलचित्र ‘गुञ्जन’मा सारा सिर्पाइली, प्रितमराज सेञ्चुरी, कबिर खड्का, सरोज खनाल, हिउँवाला गौतमलगायतको अभिनय रहेको । अष्टमान महर्जनले निर्देशन गरेको चलचित्रमा महेश दवाडीको लेखन छ । चलचित्रलाई हिराकृष्ण शाही र सुनिता शाहीले निर्माण गरेका हुन् ।
यस्तै आजबाट प्रदर्शनमा आएको त्रिकोणात्मक प्रेम कहानीमा आधारित चलचित्र ‘तिम्रो मेरो साथ’ हो । यस चलचित्रलाई रमेश एम.के पौडेलले निर्माण तथा निर्देशन गरेका हुन् । चलचित्रको कथा भने सवीर श्रेष्ठले लेखेका हुन् भने सवीरलाई बाबुराम निरौलाको स्क्रिप्ट रहेको छ । चलचित्रमा साम्राज्ञी राज्य लक्ष्मी शाह र पुष्प खडका, सन्दीप क्षेत्री, एमिली लामा, सरोज खनाल, खडक बि पुन, दिपिशा केसीलगायत कलाकारको अभिनय रहेको छ । सवीर श्रेष्ठ चलचित्रका लेखकमात्र नभई कार्यकारी निर्मातासमेत रहेका छन् । सहनिर्मातामा पासाङ लामा, अर्णव पौडेल, आर्यन पौडेल, निरु भण्डारी, अशोक पोखरेल, सुमन पौडेल र सुधीर पराजुली रहनुभएको छ भने शिव ढकालको छायांकन, सुवास भुसाल र योगेश काजीको संगीत, रामजी लामिछानेको कोरियोग्राफी र भुपेन्द्र अधिकारीको सम्पादन चलचित्रमा रहेको छ ।
