काठमाडौं । संगीतकार सन्तोष श्रेष्ठको संगीतमा भारतीय गायक कुमार सानु र गायिका देविका बन्दनाले स्वर दिएका छन् । ‘तिम्रो मायाको सागरमा’ बोलको आधुनिक गीतमा कुमार सानु र देविका बन्दनाले स्वर दिएका हुन् ।
बिहीबार देविका बन्दना नामक युट्युब च्यानलमार्फत् गीतको भिडियो सार्वजनिक गरिएको छ । काठमाडौंमा एक औपचारिक कार्यक्रमबीच बसुन्धरा भुसाल, संगीता प्रधान र शर्मिला मल्लले संयुक्तरूपमा गीत सार्वजनिक गरेका थिए ।
सुरेन्द्र मानन्धर ‘अमर’को शब्द रहेको गीतमा राजु कार्कीको एरेञ्जर छ । निकेश खड्काले निर्देशन गरेको गीतको भिडियोमा प्रियंका कार्की र आयुश जोशीको अभिनय छ । भिडियोको छायांकन बुद्ध थापाले र सम्पादन विकास धमलाले गरेका छन् । श्रेष्ठको संगीतमा यसअघि भारतीय गायिका सञ्जीवनीले पनि गीत गाएका छन् ।
