नुवाकोट । बाढीपहिरोका कारण जनजीवन प्रभावित भइरहेका बेला नेकपा एमालेको नेशनल भोलेन्टियर फोर्स राहत, उद्धार तथा व्यवस्थापनका लागि स्वयंसेवकसहित प्रभावित क्षेत्रमा परिचालित भएको छ। फोर्सका केन्द्रीय अध्यक्ष पुष्प श्रेष्ठको नेतृत्वमा ६० जना स्वयंसेवकको टोली राहत सामग्रीसहित नुवाकोट पुगेको हो।
फोर्सका अनुसार टोलीले १० लाख रुपैयाँभन्दा बढी मूल्यका राहत सामग्री नुवाकोट ल्याएको छ। स्थानीय आवश्यकता र प्रभावित नागरिकको अवस्थाबारे जानकारी लिएर टोलीले विभिन्न क्षेत्रमा राहत सामग्री वितरण गरिरहेको छ। नुवाकोटको अभियानपछि टोली रसुवा जाने तयारीमा रहेको अध्यक्ष श्रेष्ठले जानकारी दिए।
श्रेष्ठका अनुसार विपद्का बेला भाषण र आश्वासनभन्दा प्रभावित नागरिकलाई तत्काल सहयोग आवश्यक हुन्छ। यही उद्देश्यले स्वयंसेवकहरूलाई प्रभावित क्षेत्रमा परिचालन गरिएको उनले बताए। टोलीले राहत सामग्री वितरणसँगै खाना, बसोबास तथा सुरक्षाको समस्यामा परेका नागरिकलाई प्रत्यक्ष सहयोग गर्ने योजना बनाएको छ।
निःशुल्क खाना खुवाउने मेस सञ्चालन गरिने
बाढीपहिरोका कारण धेरै परिवारको घरबास प्रभावित हुनुका साथै खाद्यान्न अभाव र सुरक्षित बसोबासको समस्या देखिएपछि फोर्सले निःशुल्क खाना खुवाउने मेस सञ्चालन गर्ने तयारी गरेको छ।
राहत सामग्री वितरण गरेर मात्रै जिम्मेवारी पूरा नहुने भन्दै श्रेष्ठले प्रभावित नागरिकलाई आवश्यक अवधिसम्म निरन्तर सहयोग गर्ने योजना रहेको बताए।
फोर्सले स्थानीय तह, प्रहरी प्रशासन तथा नेपाल सरकारका सम्बन्धित निकायसँग समन्वय गरेर राहत तथा उद्धार कार्य अघि बढाइरहेको जनाएको छ। प्रभावित क्षेत्रको वास्तविक आवश्यकता पहिचान गरी सहयोगलाई प्रभावकारी बनाउन नेकपा (एमाले) नुवाकोट जिल्ला कमिटीसँग समेत सहकार्य भइरहेको बताइएको छ।
टोलीमा फोर्सका केन्द्रीय अध्यक्ष श्रेष्ठसँगै एमाले केन्द्रीय सदस्य रुपनारायण श्रेष्ठ पनि सहभागी छन्।
कम्तीमा एक महिना प्रभावित क्षेत्रमा खटिने
नेशनल भोलेन्टियर फोर्सले यसलाई आफ्नो दोस्रो चरणको राहत तथा उद्धार अभियान भनेको छ। यसअघि पनि फोर्सले विपद् प्रभावित क्षेत्रमा राहत सामग्रीसहित स्वयंसेवक परिचालन गरेको थियो।
यसपटकको अभियानलाई छोटो अवधिको औपचारिक भ्रमणमा सीमित नगरी दीर्घकालीन स्वयंसेवी अभियानका रूपमा अघि बढाउने फोर्सको योजना छ। टोली कम्तीमा एक महिनाभन्दा बढी समय प्रभावित क्षेत्रमा रहेर राहत वितरण, उद्धार, खाना व्यवस्थापन तथा आवश्यक सहयोगमा खटिने तयारीमा रहेको जनाएको छ।
स्वयंसेवकहरूका अनुसार राज्यका विभिन्न संयन्त्र उद्धार तथा राहत व्यवस्थापनमा सक्रिय भए पनि प्रभावित नागरिकको दैनिकी अझै सहज बन्न सकेको छैन। विशेषगरी खाद्यान्न, सुरक्षित बसोबास तथा अन्य आधारभूत आवश्यकताको व्यवस्थापन चुनौतीपूर्ण रहेको उनीहरूको अनुभव छ।
एमालेको विपद् अभियानसँगै स्वयंसेवक परिचालन
विपद् व्यवस्थापनका लागि नेकपा (एमाले) ले केन्द्रीय सचिव महेश बस्नेतको कमाण्डमा विपद् व्यवस्थापन समिति गठन गरेको छ। समितिअन्तर्गत पार्टीका विभिन्न जनवर्गीय संगठन पनि प्रभावित क्षेत्रमा परिचालित छन्।
अनेरास्ववियु र राष्ट्रिय युवा संघ नेपालका स्वयंसेवकहरू एक सातादेखि प्रभावित क्षेत्रमा खटिएर उद्धार, राहत तथा व्यवस्थापनमा सहयोग गरिरहेका छन्। नेशनल भोलेन्टियर फोर्सको थप जनशक्ति र राहत सामग्री परिचालनले अभियानलाई अझ व्यापक बनाउने अपेक्षा गरिएको छ।
विपद्का कारण घरबास गुमाएका तथा आधारभूत आवश्यकताबाट प्रभावित परिवारलाई तत्काल सहयोग आवश्यक रहेको स्वयंसेवकहरूको भनाइ छ। उनीहरूका अनुसार यस्तो अवस्थामा राहत सामग्रीसँगै तातो खाना, सुरक्षित बसोबास र संकटमा साथ दिने जनशक्ति पनि उत्तिकै महत्वपूर्ण हुन्छ।
त्यही उद्देश्यसहित नेशनल भोलेन्टियर फोर्सका स्वयंसेवकहरू अहिले नुवाकोटका प्रभावित बस्तीमा राहत सामग्रीसहित पुगेका छन्।
