काठमाडौं । दक्षिण कोरियाबाट थप ११ सदस्यीय विपद् राहत तथा खोज तथा उद्धार टोली बुधबार बिहान नेपाल आइपुगेको छ। कोरियन डिजास्टर रिलिफ टिम (केडीआरटी) अन्तर्गतको टोली रसुवाको भोटेकोशी बाढी प्रभावित क्षेत्रमा खोज तथा उद्धार कार्यमा सहयोग गर्न नेपाल आएको हो।
नेपाली सेनाका प्रवक्ता एवं सहायक रथी राजाराम बस्नेतका अनुसार कोरियन विमानमार्फत नेपाल आएको टोलीले खोज तथा उद्धारका लागि आवश्यक विशेष उपकरण तथा तालिमप्राप्त कुकुरसमेत ल्याएको छ। टोली बुधबारै बाढी प्रभावित क्षेत्रमा पुगेर उद्धार कार्यमा खटिने तयारीमा छ।
यसअघि दक्षिण कोरियाबाट ४ सदस्यीय उद्धार टोली नेपाल आइसकेको थियो। उक्त टोली बाढी प्रभावित क्षेत्रमा पुगेर खोज तथा उद्धार कार्यमा संलग्न रहेको छ।
बस्नेतका अनुसार थप आएको कोरियाली टोलीसँगै नेपाली सेनाको टोली पनि संयुक्त रूपमा खोज तथा उद्धार अभियानमा खटिनेछ। आवश्यक उपकरण र दक्ष जनशक्तिसहितको टोली परिचालन भएपछि बाढी प्रभावित क्षेत्रमा हराइरहेका व्यक्तिको खोजी तथा उद्धार कार्य थप प्रभावकारी हुने अपेक्षा गरिएको छ।
गत १० भदौमा रसुवाको भोटेकोशी क्षेत्रमा आएको विनाशकारी बाढीका कारण ठूलो जनधनको क्षति भएको छ। बाढीमा ९ जना कोरियाली नागरिकसमेत सम्पर्कविहीन रहेको बताइएको छ।
बाढीपछि नेपालमा जारी खोज तथा उद्धार अभियानमा विभिन्न देशले जनशक्ति, उपकरण तथा राहत सामग्री उपलब्ध गराउँदै आएका छन्। दक्षिण कोरियाले पनि आफ्ना नागरिकको खोजीका साथै नेपालका बाढी प्रभावित क्षेत्रमा उद्धार तथा राहत कार्यमा सहयोग पुर्याउन टोली परिचालन गरेको हो।
