काठमाडौं । चर्चित बालगायक सचिन परियारको निधन भएको छ । केही दिनदेखि आईसीयूमा उपचार भइरहेका १३ वर्षीय सचिनको बिहीबार बिहान पौने ११ बजे त्रिवि शिक्षण अस्पतालमा निधन भएको हो ।
अघिल्लो वर्षदेखि नै स्वास्थ्य समस्याका कारण थलिएका उनको कम्मरमुनिको भाग राम्रोसँग चल्दैन थियो । यसअघि शल्यक्रिया गरेर तंग्रिएका थिए ।
टिभी कार्यक्रम ‘इन्द्रेणी’बाट चर्चामा आएका सचिनले अभिनेता राजेश हमालसँग एक म्युजिक भिडियोमा अभिनय गरेका थिए । हास्य श्रृंखला ‘मेरी बास्सै’मा पनि अभिनय गरेका थिए । ‘रातो रबर एक’, ‘रुमाल खस्छ कि’, ‘के छ र हजुर’, ‘बरको छायाले’ लगायतका गीत गाएका छन् ।
गुल्मीका उनलाई सोही जिल्लाका युटुयुवर मोहन बस्नेतले इन्द्रेणीसम्म ल्याएका थिए ।
