काठमाडौँ । लोकप्रिय गीतकार डा. डी.आर. उपाध्यायको नयाँ गीत ‘दुई मुटु’ भर्खरै सार्वजनिक भएको छ । सागर अधिकारी ‘शरद’ को स्वर र संगीत, सञ्जय श्रीपालीको एरेञ्ज र गोविन्द सोनीको मिक्सिङ तथा माष्टरिङ रहेको सो गीतको भिडियो सार्वजनिक भएको हो ।
माइकल चन्दले निर्देशन गर्नुभएको गीतको भिडियोमा नायिका अनु शाह र डा. उपाध्यायले अभिनय गर्नुभएको छ । । उत्सव दाहालको छायांकन रहेको गीतको भिडियोलाई शिलन लम्सालले सम्पादन गर्नुभएको हो ।
‘गीत जति उत्कृष्ट भिडियो पनि त्यतिकै राम्रो दर्शकमा पस्किने कोसिस गरेको छु’, निर्देशक चन्दले बताउनुभयो । भिडियो डीआर म्युजिक एण्ड क्रियशनको युट्युब च्यानलमार्फत सार्वजनिक गरिएको हो । गीतमा अत्यधिक माया गर्ने श्रीमती गुमाउँदाको पीडालाई मार्मिक ढंगले प्रस्तुत गरिएको छ । नेपाली गीतसंगीतमा डा. उपाध्यायले विश्व रेकर्ड बनाउनुभएको छ । गिनिज बुक अफ वल्र्ड रेकर्डसहित उहाँले गीत संगीतका विविध ५१ विधामा विश्व रेकर्ड राख्नुभएको छ ।
डा. उपाध्यायका गीतमा सबै वर्ग, पेशा र समुदायलाई समेटिएको हुन्छ । उहाँका २४ एल्बममा माया प्रेम, रोमान्स तथा विछोडमात्र नभएर समाजका लागि लेखिएका गीत छन् । उहाँका चाडपर्वका गीतदेखि लिएर छोरी बिदाइ गर्दाका गीत, पर्यटन गीत, स्वास्थ्य तथा योगसम्बन्धी गीत, महिला प्रताडनासम्बन्धी गीत, मजदुर, किसान र भरियासम्बन्धी गीतलगायत विभिन्न परिवेशका छन् ।
