काठमाडौं । नायक शिव श्रेष्ठले निर्माण गर्न लागेको चलचित्र ‘एउटा यस्तो प्रेम कहानी’को गीत मंगलबार सार्वजनिक गरिएको छ ।
काठमाडौंमा आयोजना गरिएको एक कार्यक्रमा सो गीत सार्वजनिक गरिएको हो । कोरोना महामारीसँगै लामो समयसम्म सिनेमा हल बन्द भएको अवस्थामा नेपाली चलचित्रलाई चलाएमान बनाउन नयाँ चलचित्र ल्याउन लागिएको श्रेष्ठले बताएका छन् ।
दर्शकले ४० बर्षदेखि दिएको माया र विश्वासका कारण आफूले कोरोना महामारीका बीच पनि चलचित्र रिलिज गर्ने हिम्मत गरेको नायक श्रेष्ठले बताएका छन् ।
आफनै कथामा तयार गरेको ‘एउटा यस्तो प्रेम कहानी’मार्फत नायक श्रेष्ठ फेरि चलचित्र क्षेत्रमा आउन लागेका हुन । माघ १ गते रिलिज हुने तयारीमा रहेका सो चलचित्रमा चर्चित नायिका करिश्मा मानन्धरकी छोरी कविता मानन्धर र शिव श्रेष्ठकै छोरा शक्ति श्रेष्ठले एक साथ डेब्यू गर्न लागेको बताइएको छ ।
चलचित्रको शिर्ष गीतमा शक्ति श्रेष्ठ र कविता मानन्धरको रोमान्टिक अवतार देख्न सकिन्छ । बसन्त सापकोटाको संगीत, सुष्मा राईको शब्द रहेको गीतमा विश्व नेपाली र अस्मिता परियारको स्वर छ ।
शिव श्रेष्ठ, दिनेश दर्शनधारी तथा यशोदा राईको संयुक्त लगानीमा बन्न लागेको सो चलचित्रको निर्देशकमा दिपेश सापकोटा रहेका छन् भने प्रियंका कार्की, आयूष्मान देशराज श्रेष्ठ, बर्षा रावत, बसुन्धरा भुसाल, किरण के.सी., राजाराम पौडेललगायतका कलाकारहरुले अभिनय गर्ने बताइएको छ ।
https://youtu.be/vA-sa3pdT3w
