दुर्लभ सङ्कटापन्न सालक शुक्लाफाँटामा

सालकलाई इलाका वन कार्यालय पचगडीयाले शुक्लाफाँटा राष्ट्रिय निकुञ्जको अर्जुनी सेक्टरका कर्मचारीलाई बुझाएको थियो । पोथी वयस्क सालकको लम्बाइ १५० सेमी र जिब्रोको लम्बाइ ४० सेमी रहेको निकुञ्जका सहायक संरक्षण अधिकृत शैलेन्द्र चौधरीले बताउनुभयो । राति सक्रिय हुने सालकले आहाराका रुपमा धमिरा र कमिला खाने गर्छ ।

तराईको घना वनको रातोमाटो भएका क्षेत्रमा सालक पाइने गरिन्छ । अधिकृत चौधरीले भन्नुभयो, “सालकको कत्ला र छालाका लागि यसको तस्करी बढ्दो रुपमा रहेकाले यसको संरक्षण गरिनु जरुरी छ ।”

सालकबारे छुट्टै अनुसन्धान र सर्वेक्षण नगरिए पनि निकुञ्जभित्र र आसपासका क्षेत्रमा यसको सङ्ख्या निकै थोरै मात्रामा रहेको निकुञ्जका रेन्जर यमबहादुर रावतले बताउनुभयो । उहाँका अनुसार सालक १५ देखि २० वर्षसम्म बाँच्ने गर्छ । सालक यहाँ पाँच वर्षपछि पहिलो पटक देखा परेको हो ।