काठमाडौँ । सिन्धुपाल्चोकमा आज विहान भएको जन्ती बोकेको बस दुर्घटनामा मृत्यु भएका तीनै जनाको सनाखत भएको छ ।
बेहुला सुशिल थामीलाई लिएर पिस्कर मुलाबारीमा बेहुली गोरी थामीको घरतर्फ जाँदै गर्दा त्रिपुरासुन्दरी गाउँपालिका नजिकै दुर्घटना भएको थियो ।
दुर्घटना भएको वसमा रहेका ४० जना घाइते भएको बताइएको छ ।
दुर्घटनामा मृत्यु हुनेहरुमा भिमेश्व- १ दोलखाका करिब २२ वर्षीय शिव श्रेष्ठ, सोही ठाउँका अन्दाजी ७० वर्षीय मानबहादुर थामी, १९ बर्षीय दिपेन्द्र थामी रहेका छन् ।
बेहुला पनि सामान्य घाइते भएको बताइएको छ । दुर्घटनामा घाइते भएका बेहुला र उनकी आमा सामान्य उपचारपछि डिस्चार्ज भएका प्रहरीले जनाएको छ।
दोलखाको भीमेश्वर नगरपालिका–१ सुस्पाबाट गएराति करिब डेढ बजे बस जन्ती लिएर सिन्धुपाल्चोकको त्रिपुरासुन्दरी–५ पिस्करमा रहेको बेहुलीको घरतर्फ आउँदै गरेको बा ४ ख ५६१६ नम्बरको रोल्वालिङ यातायातको बस सडकबाट झण्डै २ सय मिटर तल खसेर भिरमा अड्किएको छ ।
वसमा ५५ जना सवार थिए । सामान्य घाइतेको खाडीचौरस्थित सदाबहार अस्पतालमा उपचार भइरहेको छ भने गम्भीर घाइतेलाई थप उपचारको लागि काभ्रेको धुलिखेल अस्पताल लगिएको बताइएको छ ।
