काठमाडौं, ११ फागुन । भक्तपुरबाट बेपत्ता एक ३३ वर्षीय पुरुषको दुई दिनपछि शव फेला परेको छ। तेह्रथुमको छथर गाउँपालिका–२ घर भई हाल भक्तपुरको सिपाडोल बस्ने ३३ वर्षीय गोपाल प्रसाद ढकालको शव फेला परेको हो।
उनी दुई दिनअघि भक्तपुरस्थित डेराबाट सम्पर्कविहीन भएका थिए। आज उनको शव भक्तपुर नगरपालिकाको ८ नम्बर वडा कार्यालय नजिकै फेला परेको हो।
जिल्ला प्रहरी परिसर भक्तपुरका सूचना अधिकारी एवम् डीएसपी बसन्त पाठकका अनुसार ढकालको शव रोशन बस्नेतको दुईतले गोठको भुईं तलामा परालले छोपेको अवस्थामा फेला परेको छ। शरीरका विभिन्न भागमा चोटपटक लागेको र शरीर रक्ताम्य देखिएकाले उनको हत्या भएको हुनसक्ने प्रहरीको आसंका रहेको छ।
उनी यही फागुन ९ गते भक्तपुरस्थित डेराबाट तेल किन्न जान्छु भनी निस्किएकोमा घर नफर्किएपछि आफन्तले भोलिपल्ट प्रहरी वृत्त जगातीमा हुलियासहित निवेदन दिएको थियो। त्यसपछि प्रहरी टोली उनको खोजीमा जुटेको थियो। प्रहरीले तालिम प्राप्त कुकुरको सहयोगमा अनुसन्धान थालिएको जनाएको छ।
