काठमाडौँ । नेपाली कांग्रेस महामन्त्री विश्वप्रकाश शर्माले राजावादीको हिँसात्मक आन्दोलनमा दुई युवाले ज्यान गुमाउँदा पनि पूर्वराजा ज्ञानेन्द्रले दुःख व्यक्त नगरेकोमा भन्दै प्रदर्शनकारीहरुले कस्तो राजा खोजेको भन्ने प्रश्न गरेका छन् ।
सोमवार संसदमा सम्वोधन गर्दै शर्माले भने ‘शान्तिपूर्ण भनिएको आन्दोलनको नाममा दुईजना होनहार युवाको मृत्यु भयो, तर निर्मल निवासलाई दुखेन, नागरिक मर्दा धेरैलाई दुख्यो तर, निर्मल निवासलाई दुखेन । म सोध्न चाहन्छु–तीनकुनेलाई दुख्दा, हृदय नदुख्ने कस्तो राजा चाहिएको हो ?’
प्रधानमन्त्रीले बोल्दै गर्दा राप्रपाका सांसद्ले गरेको अवरोधप्रति आपत्ति जनाउँदै शर्माले प्रधानमन्त्रीले बोल्दै गर्दा प्रतिवाद गर्न नपाइने संसद् नियमावलीको ख्याल गर्न पनि आग्रह गरेका छन् ।
राजा संवैधानिक भएर बस्न नमानेपछि मुलुकमा गणतन्त्र स्थापना भएको भन्दै सांसद शर्माले राजावादीको आन्दोलनमा लागेकाहरुलाई इतिहासको ख्याल गर्न आग्रह गरेका छन् शर्माले भने, ‘मोटर बिग्रियो भने गोरु गाडा खोज्ने ? यो पल्लो छेउमा बसेका साथीले नभनुन् । निर्मल निवास बसेका ज्ञानेन्द्र शाहले नगरुन् ।’
