काठमाडौँ । राष्ट्रिय स्वतन्त्र पार्टी (रास्वपा) को सभापतिको जिम्मेवारीमा फर्किने तयारीमा रवि लामिछाने छन् ।
आइतबार रास्वपा सचिवालयको बैठकको वैठक बस्न लगाएर साढे ५ महिनापछि लामिछानेले आफ्नो अध्यक्षतामा केन्द्रीय समितिको बैठक राख्ने निर्णय गराएका छन् ।
सचिवालयको यो निर्णय सोमबार बस्ने केन्द्रीय समितिले अनुमोदन गरेपछि मात्र लामिछानेले बैठकको अध्यक्षता गर्ने कुरा टुंगो लाग्ने रास्वपाका कार्यवाहक प्रवक्ता मनीष झाले बताएका छन् ।
सोमबार दिउँसो ३ बजे केन्द्रीय समितिको बैठक बस्ने तय भएको बताइएको छ ।
कार्यवाहक प्रवक्ता झाका अनुसार सोमबार पहिलो चरणमा दिउँसो ३ बजे कार्यवाहक सभापति अर्थात् उपसभापति डोलप्रसाद अर्यालकै अध्यक्षतामा केन्द्रीय समितिको बैठक बस्ने र त्यसपछि अपराह्न ४ बजे बस्ने केन्द्रीय समितिको दोस्रो बैठकको सभापतित्व लामिछानेले गर्ने बताइएको छ ।
सहकारी ठगी आरोपमा गत कात्तिक २ गते पक्राउ परेपछि पुस ८ गते बसेको रास्वपाको सचिवालय बैठकले उपसभापति डोलप्रसाद अर्याललाई कार्यवाहक सभापतिको जिम्मेवारी दिने निर्णय गरेको थियो । त्यसयता रवि लामिछाने पार्टीका औपचारिक बैठकमा सहभागी भएका छैनन् ।
