काठमाडौं । पूर्वराजा ज्ञानेन्द्र शाहले जरिवानाको पत्र बुझ्न नमानेपछि काठमाडौं महानगरपालिकाको नगर प्रहरी बलले हुलाकमार्फत पठाएको छ ।
जरिवानाको पत्र बुझाउन गएको महानगरको टोलीलाई निर्मल निवासमा प्रवेश गर्न नदिएको र कुनै प्रतिनिधि आएर पनि पत्र नबुझेका कारण फर्किएको टोलीले हुलाक मार्फत पत्र पठाइएको नगर प्रहरी उपरीक्षक दिनेश अर्यालले बताएका छन् ।
महानगरले गत शुक्रबार तीनकुने, कोटेश्वर क्षेत्रमा भएको आन्दोलनमा विभिन्न ९ वटा शीर्षकमा ८ वटा पत्र लेख्दै पूर्वराजा शाहलाई ७ लाख ९३ हजार जरिवाना गराएको पत्र बुझाउन आज विहान महानगर प्रहरीका डीएसपी पूर्णचन्द्र भट्टको नेतृत्वमा टोली गएको थियो ।
