पोखरा । नेपाली कांग्रेसका सभापति शेरबहादुर देउवाले पार्टीका सबै नेताबीच एकता र पार्टीलाई एकढिक्का बनाएर अघि बढ्दा यही निर्वाचन प्रणालीमा पनि बहुमत ल्याउन सकिने बताएका छन् ।
पोखरामा पार्टीले आयोजना गरेको प्रशिक्षण कार्यक्रम उद्घाटन कार्यक्रममा देउवाले संविधानले अपनाएको मिश्रित निर्वाचन प्रणालीमा कुनै पनि दलले बहुमत ल्याउन नसक्ने भन्दै कांग्रेसकै कतिपय नेताले निर्वाचन प्रणाली बदल्नुपर्ने धारणा व्यक्त गर्ने गरेको स्मरण गर्दै सहज नभए पनि असम्भव नभएको बताएका छन् ।
देउवाले भने ‘यो संविधानअनुसार बहुमत प्राप्त गर्न सहज छैन । तै पनि पार्टी एक भएर हिँडे, मतभेद बिर्सिएर हिँडे बहुमत ल्याउन सकिन्छ, पार्टीका सबै नेताहरू लागेर पार्टीलाई त्यही दिशामा अगाडि बढाउन हार्दिक अनुरोध गर्दछु ।’
सभापति देउवाले आफ्ना मतभेदहरू बिर्सिएर पार्टीमा एकता स्थापित गर्न सबै नेताहरूलाई आग्रह गर्दै भने बिपी कोइराला, गणेशमानसिंह श्रेष्ठ, कृष्णप्रसाद भट्टराई, गिरिजाप्रसाद कोइरालाजस्ता नेताले सुम्पिएको जिम्मेवारी अहिलेको नेतृत्वको काधमा आएको छ, त्यो जिम्मेवारी पूरा गर्नका लागि पनि पार्टीभित्र एकता जरुरी छ ।
देशको संविधान, देशको राजनीति समावेशी समानुपातिक व्यवस्थामा आधारित रहेको बताउँदै देउवाले भने ‘सबैको प्रतिनिधित्व संविधानले गरेको छ । यो व्यवस्था हामीले लडेर ल्याएको हो । तर, आउँदा दिन चुनौतिपूर्ण छन् । संघीय प्रणाली, समावेशी व्यवस्था सदृढ गर्न पनि पार्टीभित्र एकता चाहिएको छ ।’
नेपाली कांग्रेसले प्रदेश सभापति तथा प्रदेश प्रशिक्षण विभागका प्रमुखहरूका लागि पोखरामा आयोजित ‘संगठन र समसामयिक सन्दर्भमा अभिमुखीकरण’ कार्यक्रम आयोजना भएको हो ।