काठमाडौं । बाँकेकी निर्मला कुर्मीलाई वेपत्ता बनाउने र सम्पत्ति हडप्न खोज्नेलाई कारबाही गर्न माग गर्दै आन्दोलनमा होमिएकी अभियन्ता रुबी खान र सरकारबीच तीनबुँदे सहमति भएको छ ।
मंगलबार गृहमन्त्रालय प्रतिनिधि र खानबीच सहमति भएको हो । सो सहमतिसँगै रुबीको आन्दोलन तत्कालका लागि स्थगित भएको छ ।
सहमतिअनुसार कुर्मी प्रकरणको शीघ्र निरुपणका लागि प्रहरी प्रधान कार्यालयमार्फत जिल्ला प्रहरी कार्यालय, बाँकेलाई लेखी पठाउने निर्णय भएको छ । योसँगै खानसहितका महिलाहरुले गरेको आन्दोलन स्थगित भएको हो ।
मंगलबार भएको बैठकपछि भएको सहमतिपत्रमा मन्त्रालयको तर्फबाट उपसचिव दिलकुमार तामाङ र खानले हस्ताक्षर गरेका छन् । ०७६ मा निर्मलाको शंकास्पद मृत्यु भएको थियो । मृत्युपछि उनको सम्पत्ति हिनामिना भएको थियो ।
कुर्मीको मृत्यु र उनको सम्पत्ति हिनामिनाबारे प्रहरीले अनुसन्धान प्रतिवेदन बुझाइसकेको भए पनि जिल्ला सरकारी वकिलको कार्यालय बाँकेले मुद्दालाई अदालतमा पुर्याएको छैन ।
