ढाका । जुलाई–अगस्ट विद्रोहको नेतृत्व गर्ने विद्यार्थी समूहको मागपछि पूर्वप्रधानमन्त्री शेख हसिनाको पार्टी अवामी लिगनिकट विद्यार्थी संगठन ‘बंगलादेश छात्र लिग’लाई बंगलादेशको अन्तरिम सरकारले प्रतिबन्ध लगाएको छ।
सरकारले ‘आतंकवादविरोधी ऐन, २००९’को धारा १८ को उपधारा (१)मा प्रदान गरिएको शक्तिअन्तर्गत बंगलादेश अवामी लिगको भ्रातृ संगठन बंगलादेश छात्र लिगलाई प्रतिबन्ध लगाएको बंगलादेशको गृह मन्त्रालयले एक आधिकारिक आदेशमा जनाएको छ।
यसअघि मंगलबार पूर्वप्रधानमन्त्री शेख हसिनालाई सत्ताच्युत गर्ने नेतृत्वको समूह ‘एन्टी–डिस्क्रिमिनेसन स्टुडेन्ट मुभमेन्ट’ले बंगलादेशका राष्ट्रपति मोहम्मद साहाबुद्दिनको राजीनामासहित पाँचबुँदे मागको घोषणा गरेको थियो। मागहरूमा अवामी लिगको विद्यार्थी संगठन बंगलादेश छात्र लिगमाथि प्रतिबन्ध लगाउने पनि समावेश थियो।
‘बंगलादेशको स्वतन्त्रतापछि विभिन्न समयमा, विशेष गरी पछिल्लो १५ वर्षको तानाशाही शासनकालमा, बंगलादेश अवामी लिगको भ्रातृ संगठन ’बंगलादेश छात्र लिग’ हत्या, यातना, साझा कोठामा उत्पीडन, छात्रावास, बलात्कार र यौन उत्पीडनलगायतका विभिन्न सार्वजनिक सुरक्षसम्बन्धी गतिविधिहरूमा संलग्न रहेको छ,’ बंगलादेशको गृह मन्त्रालयले जारी गरेको आदेशमा भनिएको छ।
‘यस सम्बन्धमा दस्ताबेजी जानकारी देशका सबै प्रमुख मिडियामा प्रकाशित गरिएको छ र केही आतंकवादी घटनामा संगठनका नेता एवं कार्यकर्ताहरू फौजदारी अदालतमा पनि प्रमाणित भएका छन्,’ बुधबार साँझ जारी आदेशमा भनिएको छ । (रासस)
