पोखरा । गण्डकी प्रदेशमा नेकपा एमालेबाट मन्त्री बन्ने चार जनाकै टुंगो लागेको छ । एमालेले केन्द्रीय लेखा आयोग सदस्य पद्मा जीसी श्रेष्ठको नेतृत्वमा सरकारमा सहभागी हुने भएको छ ।
एमालेका तर्फबाट पद्मासहित पर्वतका कृष्ण पाठक, पर्वतका मित्रलाल बस्याल र कास्कीका प्रकाशबहादुर केसी मन्त्री बनेका छन् । पद्माले कृषि, भूमि व्यवस्था तथा सहकारी मन्त्रालयको जिम्मेवारी पाएकी छन् भने केसी भौतिक पूर्वाधार तथा यातायात व्यवस्था मन्त्री नियुक्त भएका छन् । यसअघिका भौतिक पूर्वाधार मन्त्री राजीव गुरुङ (दीपक मनाङे)लाई वन तथा वातावरण मन्त्रालयको जिम्मेवारी दिइएको छ ।
गण्डकीमा ९ मन्त्रालयको टुंगो लागेसँगै मुख्यमन्त्री पाण्डेले एमालेका ४ मन्त्री नियुक्तसँगै मन्त्रालयसमेत हेरफेर गरेका हुन् । सामाजिक विकास मन्त्रालयबाट फुटाइएको स्वास्थ्य मन्त्रालयको जिम्मेवारी एमालेबाट बागलुङका कृष्ण पाठकले प्राप्त गरेका छन् भने एमालेकै मित्रलाल बस्याल उद्योग, पर्यटन मन्त्री भएका छन् ।
केन्द्रीय नेतृत्वले सहमति गरेको २ महिनापछि एमाले सरकारमा सहभागी भएको हो । लामो समयदेखि भइरहेको छलफल र असहमतिलाई टुङ्ग्याउँदै आइतबार ९ मन्त्रालय बनाउने मन्त्रिपरिषद्ले निर्णय गरेको थियो ।
अहिले कांग्रेसका मुख्यमन्त्री सुरेन्द्रराज पाण्डेसहित आर्थिक मामिला मन्त्री डा. टकराज गुरुङ र सामाजिक विकास मन्त्री विन्दुकुमार थापा छन् ।
नवनियुक्त मन्त्रीहरुको शपथ आजै हुने बताइएको छ ।
