भक्तपुर । वाग्मती प्रदेशका विभिन्न जिल्लाका १६ जना तालिमका प्रशिक्षार्थीहरूले बुधबार नेपाल इको प्यानलबाट उत्पादित इको प्यानल कारखानाको अध्ययन भ्रमण गरेका छन् । विद्युतीय क्षेत्रमा व्यावहारिक प्रयोगमा केन्द्रित ऊर्जा दक्षता सम्बन्धी अन्तरदृष्टिपूर्ण तालिम कार्यक्रममा भाग लिएका उनीहरु कारखानामा पुगेर अध्ययन भ्रमण गएका हुन् ।
सहभागीहरुलाई नेपाल इको प्यानलका प्रमुख कार्यकारी अधिकृत (सिइओ) इन्जिनियर कृष्णभक्त दुवालले इको प्यानल र त्यसको उत्पादन प्रक्रियाकोबारेमा जानकारी गराएका थिए । त्यस अवसरमा इन्जिनियर दुवालले नेपाल इको प्यानल हलुका, भूकम्पप्रतिरोधी, वातावरणमैत्री, अग्नीप्रतिरोधीलगायतका विशेषताहरुका कारण देशभर यसको माग वढ्दो रहेको बताए । नेपाल इको प्यानल अस्थायी वा स्थायी संरचनामा भित्री तथा वाहिरी पार्टेशन वालको रुपमा प्रयोग हुने आधुनिक निर्माण सामाग्री हो ।
सहभागीहरु वाग्मती प्रदेश उद्योग परिसंघ (सिबिपिआई) को आयोजनामा भक्तपुर चेम्बर अफ कमर्शको संयोजकत्वमा तालिम कार्यक्रममा सहभागी भएका थिए । कारखानाको भ्रमण गर्नुअघि प्रशिक्षार्थीहरुले चेम्बर अफ कमर्स भक्तपुरमा भएको बृहत् सैद्धान्तिक तालिम सत्रमा भाग लिएका थिए । सैद्धान्तिक र व्यावहारिक शिक्षाको यो मिश्रित दृष्टिकोणले प्रशिक्षार्थीहरूलाई उनीहरूको सम्बन्धित क्षेत्रमा ऊर्जा दक्षता उपायहरूको बुझाइ र कार्यान्वयन बढाउने उद्देश्य राखेको छ । यस पहलले वाग्मती प्रदेशको वातावरण र अर्थतन्त्र दुवैलाई फाइदा पुग्ने गरी दिगो ऊर्जा अभ्यासमा योगदान पु¥याउन स्थानीय पेशेवरहरूलाई आवश्यक सीपहरू उपलब्ध गराउने ठोस प्रयासलाई झल्काउने विश्वास गरिएको छ ।
