बेनी । म्याग्दीको मालिका गाउँपालिका–७ बिमवाङमा आज दिउँसो ढुंगाको छपनी प्रहार गरेर एक वृद्धाको हत्या भएको छ । दुई जनालाई चिर्पटले हानेर घाइते बनाएका छन् ।
छप्पनी प्रहार गरेर मालिका–७ बिमवाङकी ७० वर्षीया मनिषा गर्बुजाको हत्या भएको जिल्ला प्रहरी कार्यालय म्याग्दीले जनाएको छ ।
७ वर्षीया नातिनी प्रियंका गर्बुजा र छिमेकी ६६ वर्षीया अमृता जुग्जाली घाइते भएका छन् । प्रियंका मनिषाकी नातिनी र अमृता छिमेकी हुन् । मनिषालाई छप्पनी प्रहार भएको देखेर बचाउन गएपछि उनीहरूलाई घाइते बनाइएको हो ।
घाइते दुई जनालाई दरवाङबाट हेलिकोप्टरमार्फत पोखराको मणिपाल शिक्षण अस्पताल लगिएको छ ।
प्रियंकाको अवस्था गम्भीर रहेको छ । एक जना शंकास्पद व्यक्तिलाई नियन्त्रणमा लिइएर अनुसन्धान थालिएको प्रहरीको भनाइ छ ।
