प्रधानमन्त्रीले गल्ती स्वीकार गर्ने, एमालेले संसदको अवरोध हटाउने

काठमाडौं । प्रधानमन्त्री पुष्पकमल दाहालले गल्ती स्वीकार गर्ने भएपछि नेकपा एमाले संसदको अवरोध अन्त्य गर्ने भएको छ । सोमबार प्रधानमन्त्री पुष्पकमल दाहाल प्रचण्ड, नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीचको भेटवार्तापछि यस्तो वातावरण बनेको हो ।
तीन नेताको छलफलपछि बसेको एमाले संसदीय दलको बैठकले संसदमा प्रधानमन्त्रीको स्पष्टीकरण सुन्ने र संसदको अवरोध हटाउने निर्णय गरेको संसदीय दलका प्रमुख सचेतक पदम गिरीले जानकारी दिएका छन् ।
एमाले संसदीय दलको बैठकमा ओलीले तीन नेताबीच भएको छलफलबारे जानकारी गराएका थिए । प्रमुख सचेतक गिरीका अनुसार ओलीले संसदमा सम्बोधनका क्रममा प्रधानमन्त्री प्रचण्डले आफ्नो अभिव्यक्तिका विषयमा आत्मालोचना गर्ने र त्यसपछि प्रधानमन्त्रीको सचिवालयबाट सार्वजनिक वक्तव्यप्रति दुःख व्यक्त गर्ने भएका छन् ।
गत सोमबार आयोजित एक कार्यक्रममा प्रधानमन्त्री प्रचण्डले भारतीय नागरिक प्रितम सिंह आफूलाई प्रधानमन्त्री बनाउन धेरै पटक दिल्ली गएको भन्ने अभिव्यक्ति दिएका थिए । प्रचण्डको उक्त अभिव्यक्तिपछि नेपालको सार्वभौमसत्ता र संसदको गरिमामा आँच आएको भन्दै एमालेले प्रचण्डको राजीनामा माग गर्दै संसद अवरोध गर्दै आएको थियो ।