‘नेपाल चेम्बर एक्स्पो २०२३’ जेष्ठ ४ गतेदेखि काठमाडौंमा हुने

काठमाडौं । नेपाल चेम्बर अफ कमर्सको आयोजनामा ‘नेपाल चेम्बर एक्स्पो २०२३’ जेष्ठ ४ गतेदेखि काठमाडौंमा सुरु हुने भएको छ । चेम्बरले मंगलबार काठमाडौंमा पत्रकार सम्मेलन गर्दै जेठ ४ देखि ८ गतेसम्म काठमाडौंको भृकुटीमण्डपस्थीत प्रदर्शनी कक्षमा एक्स्पो आयोजना गर्न लागेको जानकारी दिएको हो ।
निर्यात प्रवद्र्धन, वैदेशिक लगानी आकर्षण र अन्तर्राष्ट्रिय आर्थिक संगठन केन्द्रित क्रियाकलाप नै आर्थिक कूटनीतिको उद्धेश्य भएकाले मेला आयोजना गर्न लागिएको चेम्वरका अध्यक्ष राजेन्द्र मल्लले जानकारी दिएका छन् ।
छैटौं संस्करणको रुपमा सञ्चालन हुन लागेको एक्स्पोमा व्यापारिक अन्तरक्रिया, आयात–निर्यातको सूचना आदान–प्रदान तथा नेपाली उत्पादनको बजारीकरणमा विशेष जोड दिएको उनले बताए ।
१५० भन्दा बढि स्टल रहने एक्स्पोमा नेपाल लगाएत भारत, पाकिस्तान, वंगलादेश, तथा अन्य मुलुकमा उत्पादित सामाग्रीहरु रहने मल्लले जानकारी दिएका छन् । मुलुकको आर्थिक क्षेत्रलाई चलायमान बनाउनका लागि पनि एक्स्पोको भूमिका महत्वपूर्ण हुने उनको भनाइ छ ।
एक्स्पोमा अटोमोबाइल, इलेक्ट्रिकल एण्ड इलेक्ट्रोनिक, फ्लोरिङ, होम अप्लायन्सेस, फेसन वेयर एण्ड एसेसोरिज, गार्मेन्ट एण्ड टेक्स्टायल, मोबाइल एण्ड ग्यालेट्ज लगायतसामग्रीको प्रदर्शनी गरिने आयोजकको भनाइ छ ।