काठमाडौँ । राष्ट्रपति विद्यादेवी भण्डारी आज पोखरा जाने हुनुभएको छ । मंगलबार हुने विभिन्न कार्यक्रममा सहभागी हुन बुद्ध एयरको जहाजमार्फत् पोखरा जानुहुने भएको हो ।
पोखरा झरेलगत्तै भण्डारी पोखरा ग्राण्डमा लन्चका लागि जानुहुनेछ । आज उहाँ ग्राण्डमै बस्नुहुने कास्कीका प्रमुख जिल्ला अधिकारी जयनारायण आचार्यले जानकारी दिनुभयो ।
राष्ट्रपति भण्डारी मंगलबार बिहान विन्ध्यवासिनी मन्दिरको दर्शन गर्नुहुनेछ । त्यसपछि उहाँ विन्ध्यवासिनी माविको हिरक जयन्तीमा सहभागी हुने प्रजिअ आचार्यले बताउनुभयो । मंगलबार दिउँसो उहाँ गुरुङहरुको विशेष चाड ट्योंटेको अवसरमा आयोजित कार्यक्रममा सहभागी हुनुहुनेछ । कार्यक्रमलाई सम्वोधन गरेर राष्ट्रपति भण्डारी मंगलबार अपराह्न ४ बजे काठमाडौं फर्किने कार्यक्रम छ ।
राष्ट्रपति भण्डारी पोखरा आउने भएपछि सुरक्षा व्यवस्था कडा पारिएको प्रजिअ आचार्यले बताउनुभयो । राष्ट्रपति विद्यादेवी भण्डारीले नागरिकता विधयेक प्रमाणीकरण नगरी फिर्ता गरेपछि उहाँविरुद्ध प्रदर्शन हुन सक्ने भन्दै विशेष निगरानी गरिएको प्रहरी स्रोतले जानकारी दिएको छ ।
