भैरहवा । नेकपा (एमाले) उपाध्यक्ष विष्णु पौडेलले जनताले सरकारकाे अनुभूति नै गर्न नपाएकाे टिप्पणी गर्नुभएको छ ।
एमाले रुपन्देहीले धकधईमा आयोजना गरेको पार्टी प्रवेश कार्यक्रममा पूर्वउपप्रधानमन्त्री पौडेलले साढे ३ वर्ष केपी शर्मा ओलीको सरकार रहँदा जनताले सरकारकाे अनुभूति गरे पनि तर अहिलेकाे सरकार छ-छैन भनेर जनताले अनुभूति नै गर्न नपाएकाे बताउनुभयो ।
‘गठबन्धन सरकार सम्पूर्ण रुपमा असफल छ, यो सरकारले न त विकास गर्न सकेको छ, न त शान्तिसुरक्षा दिन,’ उहाँले भन्नुभयो । सरकारले देशलाई आर्थिक संकटमा पुर्याएकाे दाबी गर्दै उहाँले भन्नुभयो- देशमा विदेशी मुद्राको संचिति सकिएको छ, महँगी बढेकाे छ । पुँजीगत खर्च हुन सकेकाे छैन ।’
स्थानीय तहको निर्वाचन हुन नदिन गठबन्धनकै दलहरुले कोसिस गरिरहेकाे उहाँले बताउनुभयो । ‘यो निर्वाचन रोक्न र छेक्न भित्रबाट अनेक कोसिस अझै पनि भइरहेको बताउँदै नेता पौडेलले कुनै पनि बहानामा निर्वाचन रोक्न नदिइने बताउनुभयो ।
