पाकिस्तानको बलुचिस्तान कारबाहीमा पाँच आतङ्ककारी मारिए

इस्लामाबाद । पाकिस्तानको बलुचिस्तान प्रान्तको दक्षिणपश्चिम जिल्ला मुस्तुङमा सोमबार बिहान प्रहरीले गरेको एक कारबाहीमा परी कम्तीमा पाँच आतङ्ककारी मारिएका छन् । आतङ्ककारीविरुद्ध कारबाही गर्ने प्रहरी विभाग (सीटीडी) ले यो कारबाही जारी राखेको स्थानीय सञ्चार माध्यमले जनाएको छ ।
सीटीडीका प्रहरी जवानले आतङ्ककारी लुकेर बसेका ठाउँलाई घेरा हाली र आतंककारीहरूलाई आत्मसमर्पण गर्नका लागि आग्रह गरेको जनाइएको छ । तर आतङ्ककारीको समूहतर्फबाट गोलाबारी शुरु भएपछि प्रहरीको जवाफी कारबाहीमा कम्तीमा पाँच आतङ्ककारीको घटनास्थलमै मृत्यु भएको थियो ।
प्रहरी कारबाहीको क्रममा मारिएका ती आतङ्ककारीहरुले बलुचिस्तान प्रान्तको प्रान्तीय राजधानी क्वेटामा आक्रमण गर्ने योजना गरिरहेको प्रहरीले खुलासा गरेको छ । आतङ्ककारीका तर्फबाट भारी मात्रामा विस्फोटक पदार्थ, स्वचालित हतियार, रिमोट कन्ट्रोलहरु बरामद भएको प्रहरी स्रोतले जानकारी दिएको छ ।