नेकपा विप्लब समूहमाथिको प्रतिबन्ध फुकुवा, तीनबुँदे सहमति अनुमोदन

काठमाडौं । सरकारले नेपाल कम्युनिष्ट पार्टी विप्लव समूहमाथि लगाएको प्रतिबन्ध फुकुवा गरेको छ । प्रधानमन्त्रीको सरकारी निवास बालुवाटारमा बिहीबार साँझ बसेको मन्त्रिपरिषद बैठकले प्रतिबन्ध फुकुवा गरेको हो ।
विप्लब समूहले हिंसात्मक गतिविधि गरेपछि तत्कालीन सरकारले २०७५ फागुन २८ गतेदेखि सो समूहमाथि प्रतिबन्ध लगाएको थियो । श्रम रोजगार तथा सामाजिक सुरक्षा मन्त्री गौरीशंकर चौधरीले दिएको जानकारी अनुसार आज विहान सरकार र विप्लब समूहबीच भएको तीन बुँदे सहमतिअनुसार विप्लब समूहमाथिको प्रतिबन्ध फुकुवा गरिएको हो ।
भोलि शुक्रबार दिउँसो हुने औपचारिक कार्यक्रममार्फत् जेलमा रहेका सो समूहका नेता तथा कार्यकर्ता रिहाईको औपचारिक घोषणा गरिने मन्त्री चौधरीले जानकारी गराउनुभयो । विहान भएको दुई पक्षीय सहमतिलाई मन्त्रिपरिषद् बैठकले अनुमोदन समेत गरेको उहाँले जानकारी दिनुभयो ।
शुक्रबार हुने कार्यक्रममा प्रधानमन्त्री केपी शर्मा ओली तथा नेकपा (विप्लब समूह) का महासचिव नेत्रविक्रम चन्दले औपचारिक सम्बोधन गर्ने कार्यक्रम तय भएको बताइएको छ ।