काठमाडौँको लाजिम्पाटमा मेलम्ची खानेपानी आयोजनाले बनाएको खाल्डोमा मोटरसाइकल खस्दा एकजना घाइते भएका छन् ।
आज बिहान चक्रपथबाट रत्नापार्क गइरहेको बा ४७ प ७४३० नं मोटरसाइकल आयोजनाले बनाएको खाल्डोभित्र खस्दा मोटरसाइकल चालक घाइते भएका हुन् । घाइतेको नाम खुल्न नसकेको प्रहरीले जनाएको छ । खाल्डोभित्र खसेको मोटरसाइकललाई क्रेन लगाएर बाहिर निकालिएको ट्राफिक जवान हरिकृष्ण सेढाईँले जानकारी दिनुभयो ।
मेलम्चीको खानेपानी काठमाडौँभित्र ल्याउने बहानामा जथाभावी खाल्डो भएपछि खानेपानी तथा सरसफाइ राज्यमन्त्री दीपक खड्काले तत्काल सवारी हिड्ने बाटोमा खनिएका खाल्डो पुर्न मेलम्ची खानेपानी आयोजना निर्देशनालय–२ लाई निर्देशन दिनुभएको छ ।
राज्यमन्त्री खड्काले बाटोमा खनिएको खाल्डो नपुर्दा व्यापक धुलो र हिँड्न गाह्रो भएको जनगुनासो आएको भन्दै यसअघि पनि सम्बन्धित निकायलाई कालोपत्र गर्न निर्देशन दिनुभएको थियो । उहाँले राति मेलम्चीको काम गर्न निर्देशनालयलाई आग्रह समेत गर्नुभएको छ ।
