काठमाडौँ । विश्वकप २०२६ को तेस्रो स्थानका लागि भएको खेल सकिएसँगै गोल्डेन बुट दौडमा फ्रान्सका कप्तान किलियन एमबाप्पे शीर्ष स्थानमा बलियो देखिएका छन् । इङ्गल्यान्डविरुद्धको रोमाञ्चक भिडन्तमा दुई गोल थप्दै एमबाप्पेले जारी विश्वकपमा आफ्नो गोल सङ्ख्या १० पुर्याएका हुन् ।
एमबाप्पे १० गोल र ४ असिस्टसहित विश्वकपको पहिलो स्थानमा छन् । उनले हरेक ७० मिनेटमा गोल गर्दै विपक्षी टोलीविरुद्ध कुल ४१ पटक प्रहार गरेका छन्, जसमा उनको सट एक्युरेसी ५६ प्रतिशत र गोल कन्भर्जन २४ प्रतिशत रहेको छ ।
त्यस्तै, अर्जेन्टिनाका कप्तान लियोनेल मेसी ८ गोल र ४ असिस्टसहित दोस्रो स्थानमा छन् । ७ खेल खेलेका मेसीले प्रति ९० मिनेट १.१६ को औसतमा गोल गरेका छन् ।
जारी विश्वकपमा मेसीले हरेक ७८ मिनेटमा गोल निकाल्दा ३४ पटक पोस्टको दिशामा प्रहार गरेका छन् । आइतबार स्पेनविरुद्ध हुने फाइनल खेलमा मेसीलाई एमबाप्पेको कीर्तिमानलाई पछ्याउने अन्तिम अवसर हो ।
यस सूचीको तेस्रो स्थानमा इङ्गल्यान्डका जुड बेलिङ्घम र नर्वेका अर्लिङ हालान्ड संयुक्त रूपमा रहेका छन् । दुवैले समान ७–७ गोल गरेका छन् । बेलिङ्घमले ८ खेल खेल्दै १ असिस्ट गरेका छन् भने हालान्डले मात्र ५ खेलमा ७ गोल गरे पनि कुनै असिस्ट गर्न सकेनन् ।
