काठमाडौँ। श्रम संस्कृति पार्टीका अध्यक्ष तथा प्रतिनिधिसभा सदस्य हर्क साम्पाङले प्रधानमन्त्री बालेन्द्र शाहको पछिल्लो अभिव्यक्तिको कडा आलोचना गर्दै उनलाई ‘देशका लागि घातक’ भएको आरोप लगाएका छन् ।
प्रधानमन्त्री शाहले संसद्मा ‘नेपालले पनि भारतीय सीमा मिचेको’ भन्ने अभिव्यक्ति दिएपछि त्यसलाई लिएर राजनीतिक वृत्तमा बहस भइरहेका बेला साम्पाङले सामाजिक सञ्जालमार्फत आफ्नो धारणा सार्वजनिक गरेका हुन् ।
उनले प्रधानमन्त्री शाहको राष्ट्रियतासम्बन्धी दृष्टिकोणमाथि गम्भीर प्रश्न उठाउँदै उक्त अभिव्यक्तिप्रति असहमति जनाए ।
साम्पाङले सामाजिक सञ्जालमा लेखेका छन्, ‘बालेन देशका लागि घातक छन्, यो बुझ्न आम मानिसलाई केही समय लाग्नेछ । तर जबसम्म मानिसहरूले यो कुरा बुझ्नेछन्, त्यतिबेलासम्म देश सकिसकेको हुनेछ ।’
प्रधानमन्त्रीको पक्षमा सामाजिक सञ्जालमा प्रतिक्रिया जनाउनेहरूलाई लक्षित गर्दै उनले भविष्यमा आफूले उठाएको विषयको महत्व बुझिने दाबी पनि गरेका छन् ।
साम्पाङले अगाडि लेखेका छन्, ‘अहिले मलाई गाली गर्नेहरूलाई भविष्यमा ठूलो पछुतो हुनेछ ।’
प्रधानमन्त्री शाहको सीमासम्बन्धी अभिव्यक्तिलाई लिएर विभिन्न राजनीतिक दल, नेताहरू तथा सार्वजनिक व्यक्तित्वहरूले समर्थन र विरोधका धारणा सार्वजनिक गरिरहे ।
