काठमाडौं । आज उपसभामुखको निर्वाचन हुँदैछ । आज दिउसो ४ बजे बस्ने प्रतिनिधि सभाको बैठकले उपसभामुखको चयन गर्ने कार्यसूची रहेको छ ।
उपसभामुख पदका लागि राष्ट्रिय प्रजातन्त्र पार्टी (राप्रपा)की सरस्वती लामा र श्रम संस्कृति पार्टीकी रुवीकुमारी ठाकुर मैदानमा उत्रिएका छन् । उम्मेदवारी दर्ताको समयसीमाभित्र यी दुई बाहेक अरू कसैले दाबी नगरेकाले प्रतिस्पर्धा स्पष्ट दुई ध्रुवमा सीमित भएको हो ।
रुवीकुमारी ठाकुरको पक्षमा श्रम संस्कृति पार्टीका आर्यन राई प्रस्तावक छन् भने राष्ट्रिय स्वतन्त्र पार्टी (रास्वपा)का अशोककुमार चौधरी र अम्बिकादेवी निरौला समर्थकको रूपमा उभिएका छन् ।
उता, सरस्वती लामाको उम्मेदवारीमा राप्रपा संसदीय दलका नेता ज्ञानबहादुर शाही प्रस्तावक छन् भने खुश्बु ओली, ताहिर अलि र भरत गिरीले समर्थन गरेका छन् ।
संख्यात्मक हिसाबले हेर्दा भने प्रतिस्पर्धा एकतर्फी बन्न सक्ने संकेत देखिएको छ । २७५ सदस्यीय प्रतिनिधि सभामा सत्तारुढ रास्वपाको एक्लै १८२ मत रहेको छ । यही अंकगणित निर्णायक बन्ने देखिन्छ । यदि रास्वपाले एकीकृत रूपमा मतदान गर्यो भने रुवीकुमारी ठाकुरको जित लगभग निश्चित जस्तै छ ।
यससँगै आजको बैठकले केवल पदाधिकारी चयन मात्र होइन, संसदीय शक्ति सन्तुलनको वास्तविक चित्र पनि उजागर गर्ने अपेक्षा गरिएको छ ।
