काठमाडौं । नेपाल इन्जिनियरिङ कलेजका विद्यार्थीहरु ‘द स्टार्टअप समिट नेपाल २०२५’को विजेता भएका छन् । कलेजका कम्प्युटर इन्जिनियरिङ सातौं सेमेस्टरका विद्यार्थीहरु आनन्द रिमाल, सुलभ तिमलसिना, आदित्य मल्ल ठकुरी तथा दिया शाक्यले स्टार्टअप समिट नेपालको उपाधि जितेका हुन् ।
सोमबार राजधानीमा आयोजित समारोहमा उनीहरुलाई नगद ५० हजार प्रदान गरियो । उद्यमशीलता र नवप्रवर्तनको लागि आयोजित कार्यक्रमको उपाधिसँगै कलेजका विद्यार्थीहरुले कुल ११ लाख कोष पुरस्कार पनि प्राप्त गरेका छन् । कार्यक्रमका प्रमुख अतिथी सञ्चार तथा सूचना प्रविधि मन्त्री जगदिश खरेल रहेका थिए ।
द स्टार्टअप समिटले नेपाल र बाहिरका नीति निर्माताहरू, लगानीकर्ताहरू, पारिस्थितिक प्रणालीका अगुवाहरू, संस्थापकहरू र आकांक्षी उद्यमीहरूलाई एकै ठाउँमा उभ्याएको थियो ।
नेपालको स्टार्टअप इकोसिस्टमलाई सुदृढ पार्ने उद्देश्यका साथ आयोजना गरिएको शिखर सम्मेलनले अर्थपूर्ण संवाद, ज्ञान आदानप्रदान, नवप्रवर्तन–नेतृत्व आर्थिक वृद्धि, नीतिगत प्रतिबद्धता र नेपालको स्टार्टअप परिदृश्यको विश्वव्यापी एकीकरणमा केन्द्रित सहकार्यको लागि गतिशील प्लेटफर्मको रूपमा काम गरेको आयोजकको दावी छ ।
शिखर सम्मेलनको उद्देश्य स्टार्टअप पिचिङ सत्रहरू, विशेषज्ञ प्यानल छलफलहरू, पारिस्थितिक प्रणाली अन्तरक्रियाहरू, स्टार्टअपहरू, लगानीकर्ताहरू, सल्लाहकारहरू र उद्योग नेताहरू बीचको सम्बन्धलाई बढावा दिनु र विकास र सहकार्यको लागि नयाँ मार्गहरू खोल्नु रहेको थियो । समिटको निर्णायकहरुमा नविल बैंकका पूर्व प्रमुख कार्यकारी अधिकृत अनिल केशरी शाह, खल्तीका सह–संस्थापक तथा निर्देशक अमित अग्रवाल, एलेफ ग्रुपका पूर्व साझेदार निर्देशक कनिष्क दासगुप्ता रहेका थिए ।
