काठमाडौं । नेकपा (एमाले) को ११औं राष्ट्रिय महाधिवेशनअन्तर्गत नयाँ नेतृत्व चयनका लागि जारी मतदान सुस्त भएपछि प्रतिनिधिहरू लाइनमा जानुअघि नै मतदाता शिक्षा थालिएको छ।
भृकुटीमण्डपमा जारी महाधिवेशनका क्रममा मतदान गर्न जानुअघि मतदातालाई मिडिया सेन्टर नजिकै तीनवटा नमुना विद्युतीय मेसिन राखेर मतदाता शिक्षा दिन थालिएको हो ।
एमालेमा बितेका ८ घण्टामा ८०२ मत मात्रै खसेको छ । एमालेमा २२ सय ६३ जना मतदाता छन् । अब राति भएकाले चिसोका कारण दिउँसोभन्दा मतदान सुस्त हुने सम्भावना छ । त्यसले गर्दा एमालेको मतदान प्रक्रिया झनै ढिलो हुने अवस्था आएको छ। रातमा अझै ढिलो हुने देखिएपछि एमालेले मतदाता शिक्षा पनि अघि बढाएको हो ।
काठमाडौंको भृकु्टीमण्डपमा ८० वटा विद्युतीय भोटिङ मेसिन प्रयोग भए पनि मतदाता अभ्यस्त नहुँदा र प्राविधिक केही कठिनाइका कारण मतदान सुस्त गतिमा भइरहेको निर्वाचन आयोगले जनाएको छ ।
निर्वाचन आयोगका उपाध्यक्ष सानुराजा पोखरेलका अनुसार, बिहान ९ बजेर १२ मिनेटमा सुरु भएको मतदान साँझ ५ बजेर २ मिनेटसम्ममा ८०२ मत खसेको छ ।
एमालेका प्रचार विभाग प्रमुख राजेन्द्र गौतमका अनुसार २२६३ मतदाता छन् । तिनले ६२२ उम्मेदवारलाई भोट ३०१ केन्द्रीय सदस्य छान्नुपर्ने छ ।
निर्वाचन अधिकृतहरूले मतदान कार्य राति नै सम्पन्न हुनसक्ने अनुमान गरे पनि त्यो सम्भावना कमजोर हुँदा मतदाता शिक्षा थालिएको छ ।
