काठमाडौं । प्रधानमन्त्री सुशीला कार्कीको सचिवालयले प्रमुख स्वकीय सचिव आदर्श श्रेष्ठका विषयमा सार्वजनिक रूपमा उठिरहेका प्रश्न र समाचारप्रति ध्यानाकर्षण भएको बताउँदै एक विज्ञप्ति जारी गरेको छ। प्रधानमन्त्रीले विश्वास गर्न सक्ने व्यक्तिलाई नियुक्त गर्नु स्वाभाविक प्रक्रिया भएको सचिवालयको भनाइ छ।
प्रेस संयोजक रामबहादुर रावलद्वारा जारी विज्ञप्तिमा राज्यकोषमा न्यूनतम भार पर्ने र कार्य कुशलता सुनिश्चित गर्ने उद्देश्यले प्रधानमन्त्रीको सचिवालय अत्यन्त सीमित जनशक्तिबाट सञ्चालन भइरहेको उल्लेख छ। प्रमुख स्वकीय सचिवले श्रीमतीसहित अन्य आफन्तलाई नियुक्त गराएको दाबीबारे उठेका प्रश्नपछि सचिवालयले स्पष्टिकरण दिएको हो।
सचिवालयले कानुनसम्मत रूपमा भएको नियुक्तिलाई अनावश्यक रूपमा राजनीतिक वा व्यक्तिगत रूपमा व्याख्या नगर्न अनुरोध गरेको छ। विज्ञप्तिमा भनिएको छ, “प्रधानमन्त्रीज्यूको परिवारमा श्रीमान् मात्र हुनुहुन्छ र उहाँहरू वृद्ध उमेरको भएकाले पारिवारिक रूपमा सहयोग गर्न सक्ने विश्वासिलो व्यक्तिलाई प्रधानमन्त्रीज्यूले छनोट गर्नुभएको हो। चौबीसै घण्टा नजिकबाट सहयोग आवश्यक पर्ने भएकाले सुरक्षाका दृष्टिले पनि भरोसायोग्य व्यक्तिको नियुक्ति स्वाभाविक र कानुनसम्मत हो।”
प्रमुख स्वकीय सचिवमाथि थर वा जातीय पृष्ठभूमि मिलेको आधारमा नातेदार ठहर्याएर लाञ्छना लगाइएको भन्दै सचिवालयले त्यस्तो प्रचार नगरिदिन आग्रह गरेको छ।
रावलले विज्ञप्तिमा सचिवालयमा ६७ पदको दरबन्दी रहे पनि विगतका सरकारहरूले प्रायः सबै पदभर्ती गर्दै आएको तर प्रधानमन्त्री कार्कीले अत्यावश्यक कामका लागि मात्र २० जनाको सानो सचिवालय गठन गरेको उल्लेख गरेका छन्।
सचिवालयको विज्ञप्ति
सम्माननीय प्रधानमन्त्री सुशीला कार्कीज्यूको स्वकीय सचिवालयमा कर्मचारी नियुक्तिको विषयमा प्रकाशित-प्रसारित सामग्रीलाई लिएर हाम्रो गम्भीर ध्यानाकर्षण भएको छ ।
जेनजी आन्दोलनको बलमा स्थापित यस सरकारका सम्माननीय प्रधानमन्त्रीज्यू मितव्ययिता, पारदर्शिता र जवाफदेहिताका सन्दर्भमा जिम्मेवार र संवेदनशील रही सोहीअनुरुपको आचरण र व्यवहार गर्दै आउनुभएको छ।
राज्यकोषमा कमभन्दा कम भार परोस् र छरितो रुपमा काम गर्न सकियोस् भनेर निकै कम जनशक्तिबाट प्रधानमन्त्रीको सचिवालय सञ्चालन हुँदै आएको छ।
प्रधानमन्त्रीको सल्लाहकार र सचिवालय व्यवस्थापन कार्यविधि, २०७४ (एघारौँ संशोधन २०८१) को ३ (३) मा ‘स्वकीय सचिवालयका प्रमुख स्वकीय सचिव प्रधानमन्त्रीबाट नियुक्त हुने र अन्य पदमा प्रधानमन्त्रीको निर्देशनमा प्रमुख स्वकीय सचिवले नियुक्त गर्न सक्ने’ व्यवस्था छ।
सोही व्यवस्थाबमोजिम प्रधानमन्त्रीज्यूले आफूले भरोसा गर्न सक्ने व्यक्तिलाई प्रमुख स्वकीय सचिव नियुक्त गर्नुभएको हो।
सम्माननीय प्रधानमन्त्रीज्यूको परिवारमा आफूसँग श्रीमान् मात्र रहनुभएको र उहाँहरुको वृद्ध उमेरको कारण पारिवारिक रुपमा सहयोग गर्न सक्ने विश्वासिलो व्यक्ति प्रधानमन्त्रीज्यूले छनोट गरी नियुक्त गर्नुभएको हो।
प्रधानमन्त्रीको निवासमा रही नजिकबाट सहयोग गर्नुपर्ने र चौबीसै घण्टा पनि सँगै रहेर खट्नुपर्ने भएकाले सुरक्षाका कारणबाट समेत विश्वासिलो, भरपर्दो र रातदिन खटिएर काम गर्न सक्ने व्यक्तिको कानुनसम्मत नियुक्तिलाई लिएर प्रश्न उठाई अन्यथा व्याख्या नगर्न अनुरोध छ।
यसबाहेक अन्य नियुक्तिहरुमा प्रमुख स्वकीय सचिवलाई लाञ्छना लगाई अनावश्यक रुपमा जोडिएको र कतै थर र कतै जातीय पृष्ठभूमि मिलेकै आधारमा जबरजस्ती नातेदार भनी प्रचार गरिएको देखिएकोले त्यसो नगरिदिन हुन पनि अनुरोध छ।
कार्यविधिअनुसार ७ जना सल्लाहकार राख्न सक्ने दरबन्दी भए पनि हाल २ जना मात्र नियुक्त हुनुभएको छ। १९ जना विज्ञ कर्मचारी राख्न सक्ने दरबन्दी भए पनि ४ जना मात्र नियुक्त गरिएको छ, जसमध्ये एक जना अवैतनिक हुनुहुन्छ। स्वकीय सचिवालयमा ४१ जनाको दरबन्दी रहे पनि १४ जना मात्र कार्यरत हुनुहुन्छ।
यी सबै गरी ६७ जनाको दरबन्दी रहेको र विगतका सरकारहरुले प्रायः ती सबैमा पदपूर्ति गरी आएकामा हाल सम्माननीय प्रधानमन्त्रीज्यूले अत्यन्त जरुरी र नगरी नहुने कामका लागि मात्र निकै कम जनशक्तिको अर्थात् २० जनाको मात्र सचिवालय बनाउनुभएको छ।
जेनजी आन्दोलनको मर्म र भावनाअनुसार सुशासन कायम गर्दै स्वच्छ, निष्पक्ष, भयरहित ढंगले निर्वाचन गर्न यो सरकार लागिपरहेका बेला यसबाट ध्यानभंग गराउने उद्देश्यले आएका सामग्रीहरुमा विश्वास नगर्न पनि सबै पक्षहरुलाई विनम्र अनुरोध छ।
प्रेस संयोजक
रामबहादुर रावल
