काठमाडौं । टर्कीको एक सैनिक मालवाहक विमान अजरबैजानसँगको सिमानामा दुर्घटनाग्रस्त भएको छ। विमानमा चालक दलसहित २० जना सैनिक सवार रहेका बताइएको छ। उनीहरूको अवस्था आधिकारिक रूपमा पुष्टि भएको छैन, तर टर्कीका राष्ट्रपति रेसेप तैयप एर्दोआनसहित अजरबैजान र जर्जियाका अधिकारीहरूले मानवीय क्षति हुन सक्ने आशंका व्यक्त गरेका छन्।
टर्कीका सञ्चार माध्यमहरूले प्रसारण गरेका भिडियो फुटेजमा सी–१३० विमान घुम्दै तल झर्दै गरेको र त्यसपछि सेतो धुवाँ उडिरहेको देखिएको छ।
टर्कीको रक्षा मन्त्रालयका अनुसार, विमान अजरबैजानको हवाई अड्डाबाट मंगलबार टर्की फर्किँदै गर्दा दुर्घटनामा परेको हो। मन्त्रालयले सामाजिक सञ्जाल ‘एक्स’ (पूर्व ट्विटर) मार्फत् जानकारी दिंदै “दुर्घटनाको कारणबारे विस्तृत अनुसन्धान भइरहेको” जनाएको छ।
जर्जियाका गृहमन्त्री अली येरलिकायाका भनाइअनुसार, जर्जियाली उद्धार टोलीहरू स्थानीय समय अनुसार बेलुकी करिब पाँच बजे घटनास्थलमा पुगेका थिए। उद्धार कार्य जारी रहेको र घटनास्थल अजरबैजान सीमासँग नजिकै रहेको सिघनाघी नगरपालिका क्षेत्रमा परेको बताइएको छ।
जर्जियाको गृह मन्त्रालयले विमान जर्जियाली हवाई क्षेत्रमा प्रवेश गरेको केही मिनेटमै सम्पर्क टुटेको पुष्टि गरेको छ। विमानबाट कुनै आपतकालीन सन्देश प्राप्त नभएको र दुर्घटनाको कारणबारे प्रारम्भिक अनुसन्धान सुरु गरिएको जनाएको छ।
टर्कीको सरकारी समाचार संस्था आनादोलु एजेन्सीले उद्धृत गरेको जर्जियाली विमान प्राधिकरणका अनुसार, मौसम सामान्य रहेको भए पनि विमानले आकस्मिक गडबडीको संकेत दिएको छैन। यसले प्राविधिक समस्या वा सम्भावित मानवीय त्रुटिको सम्भावना समेत उठाएको बताइन्छ।
