काठमाडौं । रवि लामिछाने पुनः राष्ट्रिय स्वतन्त्र पार्टी (रास्वपा)को सभापति बनेका छन् ।
रास्वपाको केन्द्रीय समितिको पहिलो बैठकले उनलाई सभापतिको जिम्मेवारी दिने निर्णय गरेको हो । बैठकमा कार्यवाहक सभापति डीपी अर्यालले धन्यवाद ज्ञापन गरेका थिए ।
नव नियुक्त सभापति लामिछानेको नेतृत्वमा आजै दोस्रो बैठक बसिरहेको कार्यवाहक महामन्त्री कविन्द्र बुर्लाकोटीले जानकारी दिए । बैठकमा पार्टी र सदनका गतिविधिबारे संक्षिप्त रिपोर्टिङ हुने बताइएको छ ।
त्यसैगरी, बैठकमा ‘लिडरसिप एकेडेमी’को ‘फ्लो चार्ट’ जन यात्रा कार्यक्रम, अधिवेशन कार्यतालिका, तथा देशव्यापी जागरण र बहसबारे छलफल हुने जनाइएको छ ।
सहकारी ठगीसहित चारवटा मुद्दा दायर भएपछि लामिछाने सभापति पदबाट अलग भएका थिए । त्यसयता डीपी अर्यालले कार्यवाहक सभापतिको भूमिका निभाइरहेका थिए ।
