काठमाडौं । नेकपा एमालेका सचिव तथा सांसद योगेश भट्टराईले चैत १५ गते काठमाडौँमा भएको प्रदर्शनमार्फत पूर्वराजा ज्ञानेन्द्र शाहले सम्झौता भंग गरिसकेकाले उनलाई राज्यले पूर्वराष्ट्राध्यक्षका रूपमा दिएको सेवासुविधा खोस्नु पर्ने बताएका छन् ।
प्रतिनिधिसभामा बोल्दै सांसद भट्टराईले राजावादी आन्दोलनका जनकमाण्डर दुर्गा प्रसाईंलगायतलाई ‘लफंगा’ को संज्ञा दिँदै भने, ‘पूर्वराजा ज्ञानेन्द्रले लफङ्गाहरूलाई माला लगाएर जनताको घर जलाउन पठाउनुभयो । उहाँलाई सम्झौता गरेर नारायणहिटीबाट निर्मल निवासमा पठाउँदा पूर्वराष्ट्राध्यक्षको रूपमा सेवा सुविधा दिइएको हो । त्यो सम्झौता निर्मल निवासमा बसेर भंग गर्नुभयो । अब उहाँलाई सुविधा दिन आवश्यक छ कि छैन । सोच्नुपर्छ।’
राजाहरूले नै नेपालको मूर्ति बाहिर बेचेको आरोप लगाउँदै सांसद भट्टराईले नेपालका मूर्तिहरू अमेरिका, जर्मन र बेलायतको म्युजियममा कसको पालामा पुगे हेर्न राजावादीहरूलाई आग्रह गरेका छन् ।
सांसद भट्टराईले ‘दरबार हत्याकाण्ड कसरी भयो ? कोतपर्व कसरी भयो ? भण्डारखाल पर्व कसरी भयो ? यी सबै इतिहासका पानामा सुरक्षित छन् ।’ भन्दै राजावादीलाई स्मरण गराएका छन् ।
