काठमाडौं । गृह मन्त्री रमेश लेखकले राजावादीहरुले गरेको आक्रमण र हत्याको कानून बमोजिम कारबाही हुने बताएका छन् ।
शनिबार नेकपा (एकीकृत समाजवादी) को पार्टी केन्द्रिय कार्यालय आलोकनगरमा सञ्चारकर्मीहरुसँग कुरा गर्दै गृह मन्त्री लेखकले जनधनको क्षति गर्नेहरु माथि कानून बमोजिम अनुसन्धान गरेर कारबाही गर्ने प्रतिवद्धता जनाएका हुन् ।
राजावादीहरुले तीनकुनेमा शुक्रबार गरेको आन्दोलनका क्रममा दुई जनाको मृत्यु भएको छ भने सार्वजनिक र निजी सम्पतीमाथि तोडफोड गरिएको छ । आक्रमणकारीहरुले शुक्रवार नेकपा (एकीकृत समाजवादी) को पार्टी कार्यालयमा तोडफोड गरी आगो लगाएका थिए । सोही अनुगमन एवं निरीक्षणका क्रममा आलोकनगर पुगेका गृह मन्त्री लेखकले शुक्रबारको राजावादीहरुले प्रदर्शनका नाममा गरेको हिंसा राजनीतिक दर्शन, आदर्श, सिद्धान्त, मान्यता,चेतनासँग टाढाटाढाको पनि साइनो नरहेको जिकिर गरे ।
शुक्रबारको आन्दोलन प्रदर्शन भन्दा बढी अपराधिक घटना भएको बताए । आततायी र अमानवीय ढंगले घटना गराइएका भन्दै गृह मन्त्री लेखकले आन्दोलनकारीले मानिसहरु घरभित्र छन् भनेर थाहा हुँदा हुँदै घरमा आगो लगाउँदा एक जना पत्रकारको ज्यान गएको र नागरिकको सुरक्षार्थ प्रहरीले बल प्रयोग गर्दा अर्का एक जनाको निधन भएको बताए । । निधन हुनेहरु प्रति दुःख व्यक्त गर्दै उनले घाइते प्रति शिघ्र स्वास्थ्य लाभको कामना गरेका छन् ।
गृह मन्त्री लेखकले शुक्रबार राजावादीहरुले सञ्चार गृह, छानिछानि गणतन्त्रवादी विचार राख्ने राजनीतिक दलका नेताका घर र पार्टी कार्यालयमा आक्रमण गर्ने, निजी तथा सरकारी सम्पती ध्वस्त गर्ने, सपिङ कन्फ्ल्क्सहरुमा आक्रमण गरेको बताए । उनीहरुमाथि सरकारले अनुसन्धान गरी कारबाही गर्ने बताए ।