झापा । भारतले नेपालमा उत्पादित प्लाइउडलाई नाकामा रोकेको छ। प्लाइउड बोकेका ३४ वटा ट्रकलाई भारतस्थित पानीट्यांकी स्थल भन्सार कार्यालय रानीगञ्जले रोकेको मेची उद्योग वाणिज्य संघका अध्यक्ष खेम प्रसाईंले बताए।
ती ट्रकहरु दुई साताअघि काँकडभिट्टा नाकाबाट भारत गएका थिए। भारतीय भन्सार कार्यालयले ब्युरो अफ इन्डियन सर्टिफिकेट (बीआईएस) नभएको भनी नेपाली सामानलाई रोकेको प्रसाईंले जानकारी दिए।
बीआईएस भारत सरकारको गुणस्तर प्रमाणपत्र हो। भारतले आयात हुने सामान बीआईएस प्रमाणित हुनुपर्ने नयाँ नियम लगाएपछि नेपालबाट प्लाइउड, सिमेन्टलगायत उत्पादनहरुको निर्यात अवरुद्ध भएको छ।
काँकडभिट्टा मात्र नभइ नेपालका अरु नाकाबाट भारत निर्यात हुने प्लाइउडमा पनि भारतले अवरोध पुर्याइरहेको छ। ‘नेपालबाट प्लाइउड बोकेर भारत गएका ती ट्रकहरु पानीट्यांकीस्थित भारतीय भन्सारमा रोकिएका छन्’, अध्यक्ष प्रसाईंले भने, ‘न जान दिएको छ, न स्वदेश नै फर्काउन सकिने अवस्था छ।’
भारतीय भन्सारले तत्काल नेपाल नफर्काए सामान जफत गरिदिने चेतावनी दिइरहेको प्रसाईंले बताए। नेपाली पक्षले ती सामान निर्यातका लागि भारत सरकारलाई जीएसटी करसमेत तिरिसकेको जनाएका छन्।
नेपालमा ८० वटा प्लाई उद्योग स्थापना भएका छन्। एउटा उद्योग स्थापनाका लागि न्यूनतम २५ करोड रूपैयाँ लगानी हुने उद्योगीहरु बताउँछन्। नाकामा भारतीय पक्षबाट भइरहेको अवरोध नहटे प्लाइउड उद्योगमा भएको अर्बौँ लगानी जोखिममा पर्ने र हजारौँले रोजगारी गुमाउने जनाइएको छ।
आर्थिक वर्ष २०८०/८१ मा नेपालबाट सात अर्ब ४३ करोड रूपैयाँ मूल्य बराबरको प्लाइउड भारत निर्यात भएको थियो। आव २०७९/८० मा चार अर्ब ७० करोड रूपैयाँ र आव २०७८/७९ मा ३५ करोड रूपैयाँ मूल्य बराबरको प्लाइउड भारत निर्यात भएको थियो।
मेची उद्योग वाणिज्य संघका पूर्वअध्यक्ष ऋषि तिम्सिनाले भारतले नेपालबाट सबैभन्दा धेरै निर्यात हुने सिमेन्ट र प्लाइउडमा भन्सार अवरोध हुँदा मुलुकलाई ठूलो आर्थिक क्षति पुगिरहेको बताए।
प्लाइउड नेपाली कच्चा पदार्थमा आधारित र व्यापार घाटा न्यूनीकरणमा महत्त्वपूर्ण योगदान पुर्याउने निर्यात वस्तु भएकाले यसको निर्वाध निर्यातको वातावरण बनाउन सरकारले भारत सरकारसँग उच्चस्तरीय सहमति बनाउनुपर्ने तिम्सिनाको सुझाव छ।
भारतीय भन्सार अवरोध नहटेपछि प्लाइउड उद्योगले कामदारहरुको काम गर्ने अवधि कटौती गर्न थालेका छन्। तिम्सिनाका अनुसार विगतमा २४ घण्टा चल्ने प्लाइउड कारखानाहरु हाल मुस्किलले आठ घण्टा सञ्चालन भइरहेका छन्।
प्लाइउडको निर्यात अवरोध हटाउन माग गर्दै मेची उद्योग वाणिज्य संघले नेपाल उद्योग वाणिज्य महासंघलाई समाधानका लागि पहल गरिदिन पत्राचार गरेको छ। महासंघले नेपाल सरकार, परराष्ट्रमन्त्री र भारतीय राजदूतावाससँग कुराकानी गरिरहेको संघका अध्यक्ष प्रसाईंले बताए।
‘प्लाइउड निर्यात कुनै हालतमा रोकिनु हुँदैन भनेका छौँ’, प्रसाईंले भने, ‘नेपाली उद्योगले बीआईएसका लागि आवेदन भरेको एक वर्ष भइसक्यो। अहिलेसम्म न प्रमाणपत्र दिएको छ, न भन्सार खुला गरेको छ।’ (रासस)
