किएभ । युक्रेनी राष्ट्रपति भोलोदिमर जेलेन्स्कीले सोमबार रुसको आक्रमणको तेस्रो वर्षमा यस वर्ष ‘वास्तविक, दीर्घकालीन शान्ति’को आह्वान गरेका छन् । किएभमा आयोजित शिखर सम्मेलनमा भेला भएका युरोपेली नेताहरूको बीचमा उनले शान्तिको आह्वान गरेका हुन् ।
रुसले आफ्नो हितलाई ‘उपयुक्त’ बनाउने सम्झौतामा पुग्न सकेमा मात्र आक्रमण रोक्ने बताएको छ र युरोपमाथि लडाइँलाई लम्ब्याउन चाहेको आरोप लगाएको छ ।
रुसी राष्ट्रपति भ्लादिमिर पुटिनको सन् २०२२ फेब्रुअरीमा ‘विशेष सैन्य अभियान’ सुरु गर्ने निर्णयले दोस्रो विश्वयुद्धपछिको युरोपको सबैभन्दा ठूलो द्वन्द्व सुरु गरेको थियो ।
दुवै पक्षका दशौँ हजार सैनिक र युक्रेनी नागरिक मारिएका छन् । देशको दक्षिण र पूर्वका सहरहरू ध्वस्त भएका छन् र लाखौँ मानिस आफ्नो घर छोड्न बाध्य भएका छन् ।
“यो वर्ष वास्तविक, स्थायी शान्तिको सुरुआतको वर्ष हुनुपर्छ”, जेलेन्स्कीले किएभमा आफ्ना समर्थकहरूलाई भने, “पुटिनले हामीलाई शान्ति दिँदैनन् । हामीले शक्ति, विवेक र एकताको माध्यमबाट शान्ति जित्नुपर्छ ।”
युरोपेली आयोग प्रमुख उर्सुला भोन डेर लेयनले पनि अमेरिकासँग द्वन्द्व कसरी अन्त्य गर्ने भन्ने विषयमा वार्ता सुरु भए पनि पुटिन पछि हट्ने सम्भावना नरहेको चेतावनी दिए ।
“पुटिनले भूमिमा यो युद्ध जित्नका लागि पहिलेभन्दा बढी कडा प्रयास गरिरहेका छन्, उनको लक्ष्य युक्रेनको आत्मसमर्पण हो,” उनले भने । उनले युक्रेनको युद्धलाई ‘युरोपको भविष्यका लागि सबैभन्दा केन्द्रीय र महत्त्वपूर्ण संकट’ भने ।
मध्यस्थकर्तालाई सम्झौता गर्न सहयोग गर्ने प्रस्ताव गरेका टर्कीका राष्ट्रपति रेसेप तैयप एर्दोगनले शिखर सम्मेलनमा ‘युक्रेनको क्षेत्रीय अखण्डता, सार्वभौमिकता र स्वतन्त्रता’लाई दृढतापूर्वक समर्थन गरेको र वार्तामा दुवै पक्षको ‘निष्पक्ष’ प्रतिनिधित्व गर्नुपर्ने बताए । (रासस/एएफपी)
