वासिङ्गटन । अमेरिकी राष्ट्रपति डोनाल्ड ट्रम्पले एसोसिएटेड प्रेस (एपी)लाई ‘कट्टर वामपन्थी संगठन’को संज्ञा दिएका छन्। मेक्सिकोको खाडीका नामबाट विश्वमा परिचित जलक्षेत्रलाई पुनः नामकरण गर्न प्रयोग गरेको विषयलाई अमेरिकी सञ्चारमाध्यम एपीले ट्रम्पले भनेजस्तो गरी उल्लेख नगरेपछि उनले एपीविरुद्ध उक्त आरोप लगाएका हुन्।
ट्रम्पले आफ्नो कार्यकालको पहिलो महिनामा उक्त क्षेत्रलाई ‘गल्फ अफ अमेरिका’को संज्ञा दिएका थिए। अमेरिकी समाचार एजेन्सी एपीले उनको आदेश पालना नगरेसम्म एसोसिएटेड प्रेस (एपी)का पत्रकारहरूलाई ह्वाइट हाउसमा प्रवेशमा प्रतिबन्ध लगाएका थिए।
ह्वाइट हाउसले एपीका पत्रकारहरूलाई एयर फोर्स वान र ओभल अफिसमा प्रवेश रोकेको छ।
बिहीबार राजधानी वासिंगनमा रिपब्लिकन गभर्नर्स एसोसिएसनलाई सम्बोधन गर्दै ट्रम्पले भने, ‘हाम्रो एउटा समाचार संस्थासँग लडाइँ छ, जुन एक कट्टर वामपन्थी संगठन हो। उसले मेक्सिकोको खाडीका रूपमा चिनिँदै आएको क्षेत्रलाई अमेरिकाको खाडी भनौँ भनी हामीले गरेको प्रस्ताव अस्वीकार गरेको छ र गर्छ। यसले हामी सबैलाई नराम्रो व्यवहार गर्छ।’
उनले सम्भावित कानुनी कारबाहीबारे आफ्नो दाबी के हो भन्ने उल्लेख नगरी अगाडि भने, ‘हामी अहिले कुनै पनि पत्रकार सम्मेलनबाट उनीहरूलाई बाहिर निकालिरहेका छौँँ। मलाई विश्वास छ कि उनीहरूले मुद्दा हाल्नेछन्, र शायद उनीहरूले जित्नेछन्। फरक पर्दैन। यो केवल यस्तो कुरा हो जसको बारेमा हामी दृढतापूर्वक महसुस गर्दछौँ।’
लामो समयदेखि अमेरिकी पत्रकारिताको खम्बाको रूपमा रहेको १८० वर्ष पुरानो यो सञ्चारमाध्यमले अमेरिका र विश्वभरका छापा, टिभी र रेडियो प्रकाशन तथा प्रसारणहरूका लागि समाचार प्रदान गर्दछ।
गत महिना एपीले एक ‘स्टाइल नोट’मा ‘मेक्सिकोको खाडीले चार सय वर्षभन्दा बढी समयदेखि यो नाम बोकेको’ उल्लेख गरेको थियो। यसको प्रतिक्रियामा आएको राष्ट्रपति ट्रम्पको कार्यकारी आदेशमा ‘संयुक्त राज्य अमेरिकाभित्र मात्र यो अधिकार बोकेको’ उल्लेख गरिएको थियो। (रासस)
