काठमाडौं । प्रसिद्ध तीर्थस्थल पाथीभरामा सकेसम्म चाँडै केबुलकार निर्माण सक्नुपर्ने माग गर्दै ताप्लेजुङ जिल्लावासीले र्याली निकालेका छन् ।
पाथीभरामा निजी क्षेत्रबाट केबुलकार निर्माण गर्न शिलान्यास समेत भइसेकका बेला उत्पन्न विवादबीच ताप्लेजुङवासीले पाथीभरामा कुनै पनि हालतमा केबुलकार निर्माण गर्नुपर्ने र सकेसम्म चाँडै काम सक्नुपर्ने माग गर्दै नागरिक सद्भाव र्याली निकालेका हुन ।
सदरमुकाम फुङलिङमा निकालिएको सद्भाव र्यालीमा ताप्लेजुङवासीले पाथीभरा देवी दर्शन गर्न स्वदेश तथा विदेशबाट आउने हजारौं–लाखौं तीर्थयात्रीको सहज आवागमनका लागि केबुलकार आवश्यक रहेकाले चाँडै निर्माण सक्नुपर्ने माग गरेका छन् ।
सयौं जिल्लावासी सहभागी र्यालीमा ‘ताप्लेजुङले के भन्छ ? केबुलकार ल्याऊ भन्छ’, ‘स्थानीयवासी के भन्छन् ? केबलकार ल्याऊ भन्छन्’ जस्ता नारा लगाउँदै सदरमुकाम परिक्रमा गरेका छन् ।
‘बृहत नागरिक सद्भाव र्याली’ लेखिएको ब्यानर सहित निकालिउको र्यालीमा नौमती बाजा र च्याब्रुङ लगायत विभिन्न जातजाति र समुदायको संस्कृति झल्कने झाँकी पनि प्रदर्शन गरिएको थियो ।
र्यालीपछि फुङलिङमा आयोजित भेलामा जिल्लावासीले केबुलकार निर्माणबाट समग्र जिल्लाको समृद्धिमा थप टेवा पुग्ने बताएका छन् । केबुलकार निर्माणका साथै जिल्लाको विकासमा सबै एकजुट हुनुपर्ने सन्देश दिन नागरिक सद्भाव र्याली निकालिएको सहभागीहरुले बताएका छन् ।
