काठमाडौं । नेपाली कांग्रेसका महामन्त्री विश्वप्रकाश शर्माले बीपी कोइरालालाई प्रचण्डले बुझ्न ढिला गर्दा देशले १० वर्षे हिंसात्मक द्वन्द्व खेप्नु परेको बताएका छन् ।
सोमबार पूर्वकर्मचारी समाज नेपालले आयोजना गरेको कार्यक्रमलाई सम्बोधन गर्ने क्रममा बीपीको मेलमिलाप नीतिबारे व्याख्या गर्दै शर्माले भने ‘यो समाजलाई बीपीले पहिल्यै संगै जाऔं भन्नुभयो । कम्युनिस्ट आन्दोलनले यो कुरा बुझ्दैगर्दा ढिलो भएको उदाहारण हो, कमरेड प्रचण्ड हुनुपर्छ ।’
महामन्त्री शर्माले थपे, ‘मदन भण्डारीले जुन कालखण्डमा वीपीलाई बुझ्नुभयो, त्यही कालखण्डमा प्रचण्डले बुझ्नुभएको भए १० वर्षे हिंसात्मक द्वन्द्व हुँदैन थियो । यतिधेरै मान्छे मारिनु पर्दैन थियो ।
प्रचण्ड पहिलोपटक प्रधानमन्त्री भएपछि सुन्दरीजलको जेलमा गएर बीपीका सामानहरू सुमसुम्याएको स्मरण गर्दै महामन्त्री शर्माले भने “प्रचण्ड पहिलो पटक प्रधानमन्त्री भएपछि सुन्दरिजलको जेल जानुभयो, वीपीले प्रयोग गरेका सामानहरू हेर्नुभयो, वीपीले प्रधानमन्त्री छँदा लगाएको कोट सुमसुम्याउनुभयो । अनि बाहिर मिडियामा निस्केर भन्नुभयो, – ‘वीपी मेरो प्रेरणाको स्रोत’ ।”
