काठमाडौँ । गोरखामा गएराति पहिरोले घर पुरिँदा एकै परिवारका तीनसहित चार जना बेपत्ता भएका छन् भने एक जनाको उद्दार गरिएको स्थानीयले जनाएको छ ।
गोरखाको उत्तरी धार्चे गाउँपालिका–५ सिङग्लामा गएराति ३ बजे गएको पहिरोले स्थानीय जितबहादुर गुरुङको घर पुरिँदा घरमुली गुरुङसहित चार जना बेपत्ता भएका हुन् ।
सुरुमा ५ जना बेपत्ता भएका भएपनि पछि एक जनालाई गम्भीर घाइते अवस्थामा फेला परेको स्थानीयले जनाएका छन् ।
बेपत्ता हुनेमा घरमुली जितबहादुर गुरुङ, उनकी पत्नी कान्छी गुरुङ र बुवा कान्छामान गुरुङ र सोही घरमा बास बसेका हाइड्रोका कामदार स्थानीय रमेश गुरुङ बेपत्ता छन् ।
पहिरोमा पुरिएर स्थानीय दिलिप गुरुङ गम्भीर घाइते भएको बताइएको छ । घाइतेलाई हेलिकप्टर चार्टर गरेर काठमाडौँ लैजाने तयारी भएको बताइएको छ ।
पहिरोस्थल नजिकै वाटर इनर्जी हाइड्रो पावर निर्माणाधिन अवस्थामा छ। सोही हाइड्रो पावरमा काम गर्ने मजदुरसहित नौ जना गएराति सो घरमा बास बसेका थिए ।
राति एक्कासी स्थानीय ड्युपार खोलामा लेदोसहितको ठूलो बाढी आउँदा एउटा घर र एउटा गोठ पुरिएको थियो । केही कामदारले भने भागेर ज्यान जोगाएका छन् ।
