काठमाडौं । बाँकेको जानकी गाउँपालिका ४ मा प्रहरीले कोहलपुर नगरपालिका–११ का ३० वर्षीय आकाश रानालाई गोली हानेर नियन्त्रणमा लिएको छ ।
रानाको खुट्टामा एक राउण्ड गोली लागेको छ भने उनी खतरामुक्त रहेको जिल्ला प्रहरी कार्यालय बाँकेले जनाएको छ ।
तिहारको टीकाको दिन कोहलपुरमा मिनबहादुर विकलाई खुकरी प्रहार गरी गम्भीर घाइते बनाएर भागेका रानालाई प्रहरीले खोजीरहेको थियो । सोही क्रममा जानकी गाउँपालिकामा लुकेर बसेको सूचना पाएपछि उनलाई नियन्त्रणमा लिन पुगेको प्रहरीले उनी भागेपछि एक राउण्ड गोली चलाएको हो ।
लागुऔषध मुद्दामा ५ वर्ष जेल बसेर छुटेका रानाविरुद्ध गत कात्तिक २८ गते एक १० वर्षीया नाबालिकालाई जबरजस्ती करणी गरेको उजुरीसमेत प्रहरीमा परेको छ । उनले तिहारको टीकाको दिन राति ३ बजेतिर कोहलपुरमा मिनबहादुर विकलाई खुकरी हानेर घाइते बनाएका थिए । मिनबहादुरको उपचार नेपालगञ्जमा हुन नसकेपछि भारतको लखनउ लगिएको बताइएको छ ।
