एमाले सुदूरपश्चिम प्रदेश अधिवेशन आज, अध्यक्ष ओलीले उद्घाटन गर्ने

कैलाली । नेकपा एमालेको सुदूर पश्चिम प्रदेश अधिवेशन आजबाट सुरु हुँदै छ । धनगढीस्थित सौराइ ब्यांक्वाइटमा शुरु हुने अधिवेशनको उद्घाटन ११ बजे एमाले अध्यक्ष केपी शर्मा ओलीले गर्ने बताइएको छ ।
प्रदेश अधिवेशनका लागि पार्टीका महासचिव शङ्कर पोखरेल, सचिव तथा कर्णाली इन्चार्ज लेखराज भट्ट, सचिव तथा सुदूरपश्चिम प्रदेश इन्चार्ज छविलाल विश्वकर्मा, स्थायी कमिटी सदस्य तथा सङ्गठन विभाग प्रमुख काशीनाथ अधिकारी, स्थायी कमिटी सदस्य तथा खेलकुद विभाग प्रमुख कर्णबहादुर थापालगायतका नेताहरु सहभागी हुने बताइएको छ ।
उद्घाटन सत्र सकिए लगत्तै आजै बन्द सत्र सुरु हुने बताइएको छ । प्रदेशको अध्यक्षमा कृष्णप्रसाद जैसी, कमल तिमिल्सिना र वचनबहादुर सिंहले दाबी गरेका छन् । दावी प्रस्तुत गरेका नेताहरुबीच सहमति जुटाउने प्रयास भइरहेको नेताहरुले बताएका छन् ।
अध्यक्ष बाहेकका अन्य पदाधिकारी पदमा पनि आकाङ्क्षीहरू धेरै छन् । सवै प्रदेशमा सहमतिको प्रयास भएपनि असफल भएपछि निर्वाचनबाटै नेतृत्व चयन भएका छन् । सुदूरपश्चिम प्रदेशमा पनि निर्वाचन हुने प्रायः निश्चित रहेको प्रदेशका नेताहरुले बताएका छन् ।