प्रहरी वरिष्ठ नायव निरीक्षक पौडेल खाजा घरमा मृत फेला

बागलुङ । इलाका प्रहरी कार्यालय भिमगिठेका इन्चार्ज प्रहरी वरिष्ठ नायव निरीक्षक उज्ज्वल पौडेल एक खाजा घरमा मृत अवस्थामा भेटिएका छन् ।
इलाका प्रहरी कार्यालय बुर्तिवाङका प्रहरी निरीक्षक राजेश अधिकारीले बडिगाड गाउँपालिका वडा नं. ६ को आशा होटल एण्ड खाजा घरमा पौडेल मृत भेटिएको बताएका छन् ।
गएराति करिब १ बजेको समयमा घटना भएको राति २ बजे प्रहरी घटनास्थलमा पुगेको उनले बताएका छन् ।
अहिले घटनास्थल प्रहरीले सिल गरेर होटल सञ्चालक आशा कुँवर र उनको छोरालाई नियन्त्रणमा लिएको बताइएको छ । जिल्ला प्रहरी कार्यालय बागलुङको टोली पुगेपछि अनुसन्धान अगाडि बढ्ने इलाका प्रहरी कार्यालय बुर्तिवाङका प्रहरी निरीक्षक अधिकारीले बताएका छन् ।
घटनास्थल इलाका प्रहरी कार्यालय भिमगिठेदेखि करिब ३ किलोमिटर तथा जिल्ला प्रहरी कार्यालय बागलुङ देखि करिब ८० किलोमिटरको दुरीमा रहेको बताइएको छ ।