बैंकर शाह बने रास्वपाको प्रशिक्षण विभाग प्रमुख

काठमाडौँ । चर्चित तथा सेलिव्रेटी बैंकर अनिलकेशरी शाह राष्ट्रिय स्वतन्त्र पार्टीको प्रशिक्षण विभाग प्रमुख बनेका छन् । आज विहान मात्रै सो पार्टीमा प्रवेश गरेका शाहलाई रास्वपा सभापति रवि लामिछानेसहितका नेताहरुले बालाजुस्थित पार्टीको नयाँ केन्द्रीय कार्यालयमा एक कार्यक्रमबीच स्वागत गरेका थिए ।
राष्ट्रिय स्वतन्त्र पार्टीको केन्द्रीय समिति र संसदीय दलको संयुक्त बैठकले शाहलाई प्रशिक्षण विभाग प्रमुख बनाएको हो।
पछिल्लो पटक नविल बैंकको सीईओको भूमिकाबाट बिदा भएपछि मोटिभेस्नल स्पिकरका रुपमा सक्रिय शाहले नेतृत्व विकाससम्बन्धी तालिम पनि दिने गरेका छन् ।
रास्वपाले आज पार्टी स्थापना दिवसका अवसरमा पार्टी कार्यालयमा विशेष कार्यक्रमको आयोजना गरेको छ ।
स्थापना दिवसका अवसरमा पत्रकार सम्मेलन गर्ने र दिउँसो १ बजेदेखि ५ बजेसम्म चियापन कार्यक्रम आयोजना गरेको छ ।
चियापानमा प्रधानमन्त्री तथा माओवादी केन्द्रका अध्यक्ष पुष्पकमल दाहाल, पूर्वप्रधानमन्त्री तथा नेकपा एमालेका अध्यक्ष केपी शर्मा ओली, पूर्वप्रधानमन्त्री तथा नेपाली कांग्रेसका सभापति शेरबहादुर देउवालगायत सवै पार्टीका शीर्ष नेता, कूटनीति नियोगका प्रतिनिधि, वुद्धिजीवी, नागरिक समाजका अगुवालगायतकालाई निमन्त्रणा गरिएको बताइएको छ ।